2 ka manag-uyab gipamusil patay

CEBU, Philippines - Napalgang  patay   ang gituohang manag-uyab nga adunay samad pinusilan sa ilang mga lawas  sulod sa ilang gipuy-an sa sitio Bahak, lungsod sa Liloan  kagahapon  pasado alas 10:00  sa buntag.

Ang   mga  biktima  mao sila  si  Leodita Cañete, 49 ug Nerio Tancawan, 57, nga molupyo sa Libertad, lungsod sa Daanbantayan.

Sa pakighinabi sa Banat News ni PO3 Jason Gayo, sa Liloan Police   Station  nasayran  nga   sa  wala pa  ang  hitabo,  nagpa-blotter ang biktima  sa kapolisan  sa Liloan  niadtong  Domingo pasado  alas 8:00  sa  gabii. Kini  human   makadawat og text  message  gikan sa usa ka Danilo Beriso kinsa nanghulga kaniya.

Matud pa ni Gayo nga tipik sa maong text nagkanayon nga ‘Kun gusto ka nga dili ta mag eskandalo ,pauli na sila karun, kun  imo na pakatulgon sa balay dili ka magmahay, dili ta kabuntagan ani. Tungod sa maong hulga  giingong  gipabantayan   og  polis ang  maong  dapit  sa biktima.

Si PO1 Jose Aaron Ortega uban sa drayber sa biktima  maoy  nagbantay  sa  maong  lugar  diin  namahuway  ang  duha  ka biktima.

Apan  kagahapon  sa pasado alas 3:00  sa kaadlawon  may  nadunggan si PO1 Ortega nga   mura  og mibato kanila hinungdan nga dali siyang  mipahibalo sa police station apan giingong wala nila masuta nga  didto   sa lugar  nga  nahimutangan  sa  mga  biktima.

Kagahapon  sa   buntag ,  nananghid pa si PO1 Ortega   kang  Cañete pinaagi sa pagsampit   niini apan giingong wala gayud kini motubag.

Milanat na lang og pila ka oras hangtod nga nakadesider na lang ang igsuon sa biktima nga ablihan ang balay niini.

Dihang giablihan  ang  balay, didto na nasuta ang patay’ng lawas sa duha nga gikatahong adunay samad pinusilan. Nagduda  ang  kapolisan nga ang nadunggang bato ni PO1 Ortega mao na kadto ang pagpamusil apan wala lang kini maklaro tungod usab sa kakusog sa uwan   sa maong  higayon.

Sa pagkakaron ang kapolisan sa lungsod sa Liloan padayon pa  nga mipahigayon og lawom nga imbestigasyon kalabot sa maong insidenti. (WC) (BANAT NEWS)