Tinun-an gilugos gipatay

CEBU, Philippines - Usa ka 19-anyos nga tinun-ang babaye sa Sibonga Community College nga nagkuha og kursong Education ang napalgang patay ug gituohang biktima sa pagpanglugos diha sulod sa panimalay sa iyang uyoan sa sitio Taloot, sa barangay Poblacion sa lungsod sa Sibonga kagahapon sayo sa buntag.

Si SPO3 Darlene Banogon, hepe sa Women and Children Protection Desk sa Sibonga Police Station miila sa biktima nga mao si May Grace Superales,19, taga barangay Basak sa maong lungsod apan diha magpuyo sa balay sa uyoan sa lugar diin nahitabo ang krimen.

Matud pang Banogon sa pakighinabi sa Banat News dunay usa ka samad dinunggaban sa liog nga daw inagian sa icepick ang biktima nga nakaingon sa iyang hinanaling kamatayon.

Nakita usab sa imbestigasyon nga dunay timailhang gilugos ang biktima una pa kini gipatay.

“Initial investigation nato mura og gilugos gyud kay nahushos naman ang iyang panty,” matud pang Banogon.

Nagduda si Banogon nga posibleng misukol ang biktima gumikan kay nagkaguliyang na man ang mga butang sa sulod sa lawak nga gikatulgan niini.

Wala diha ang uyoan sa biktima atol sa pagkahitabo tungod kay didto kini sa bukid nananom og mga kahoy.

Matud pang Banogon, uwahing nakitang buhi ang biktima nianang Huwebes sa gabii nga nakig-uban sa mga classmates nga nanuroy sa Poblacion tungod sa kalingawan nga nalakip sa opening salvo sa kapistahan sa Sibonga.

Matud pang Banogon, dili gyud ‘secure’ ang gipuy-an sa biktima tungod kay walay tarong nga lock sa pultahan kay pisi ray gigamit nga hikot sa pultahan.

Ang mga classmates niya nahibulong kagahapon nga wala makatungha sa klase si Superales maong ilaha kining gisuroy ug mao na lay ilang naabtan nga patay na kini hinungdan nga sila misumbong sa kapolisan.

Ang kapolisan miimbitar pa sa mga tawong uwahing gikauban sa biktima aron makakuha og lead sa maong imbestigasyon. (BANAT NEWS)