Labandera patay, anak sa mayor angol

CEBU, Philippines - Patay ang usa ka labandera ug kritikal ang kahimtang sa 15-anyos nga anak sa mayor dihang nakuryentihan silang duha sa hayhayan diha sa Poblacion sa lungsod sa Tudela sa isla sa Camotes niadtong Miyerkules sa alas 2:45 sa hapon.

Ang nakuryentihan ug namatay mao si Salome Del Corro,42, labandera ug ang anak ni Tudela Mayor Erwin Yu nga si Marvin Dominique Yu,15 anyos. Subay sa spot report nga giduso sa Tudela Police sa operations branch sa Cebu Police Provincial Office ang labandera matud pa nanglaba sa mga sinina ug habol ug pagkahuman manghayhay na unta siya sa mga linabhan  apan kalit kining nakuryentihan.

Ang anak sa mayor nakadungog sa siyagit sa labandera daling migawas ug misuway og tabang kaniya pinaagi sa pagbira kaniya palayo sa hayhayan apan naapil kini og kakirig.

Ang duha daling gidala sa Maningo District Hospital sa lungsod apan gideklarar nga Dead on Arrival kon DOA si Del Corro samtang gibalhin sa tambalanan dinhi sa dakbayan sa Sugbo ang anak sa mayor nga nakaangkon og grabeng paso sa kalawasan.(/EIM) (BANAT NEWS)