Gang rape victim gilugos sa marshal

CEBU, Philippines - Usa ka 21-anyos nga dalagang biktima sa gang rape ug gipailawom sa witness protection program(WPP) sa Department of Justice ang midangop sa Lapulapu City Police Office ug mipasangil nga gilugos siya sa usa ka sakop sa WPP marshal.

Ang biktima nga si “Nena” (tinuod ngan gitago) mitug-an ngadto ni Lapulapu City Police Office Director Sr. Supt. Rey Lyndon Lawas nga siya gisugdan og lugos sa WPP marshal nga ginganlan lang og “Code name Billy” sukad pa niadtong bulan sa Enero hangtod Marso ning tuiga.

Matud pa ni Nena lugoson siya kada duty ni Billy ug tionan og armas ug hulgaon nga patyon kun mosumbong.

Nasagmuyo ni Nena sa dihang iyang gisumbong ni Atty. Llena Ipong-Avila ang nagdumala sa WPP sa nahitabo kaniya apan igo lang siyang gitambagan nga dili pasabaon kay pamilyado si Billy.

Misamot ang kasagmuyo ni Nena sa dihang gidala siya sa usa ka mental institution kay gidudahan na hinuon siya ni Ypong nga may deperensya sa pangisip.

“Mianha ko sa DOJ aron mahatagan og hustisya unya mao na hinuon ni nahitabo nako. Ang nakasakit pa kay naalaan pa ko og buang,” matud pa sa biktima sa Balitang Bisdak.

Ang ginikanan ni Nena nabalaka karon nga naa sa gawas ang anak tungod kay unom sa walo ka tawong mi-gang rape kaniya wala pa madakpi.

Si Nena giingong mi-execute og affidavit nga mogawas na siya sa WPP niadtong Huwebes sa gabii (Hulyo 25).

Si Nena gilugos niadtong Pebrero tuig 2012 sa walo ka mga lalaki  diha sa Brgy. Mactan dakbayan sa Lapulapu.  Sila si Edgar Paduga ug Dioscoro Igoy nadakpan na.

Si Lawas sa iyang bahin mirekomendar sa dalaga nga adto i-blotter sa Guadalupe Police Station ang iyang reklamo kay didto nahitabo ang giingong pagpanglugos.

Samtang si Prosecutor Llena Ipong-Avila, mipadayag nga mohimo na unta sila og imbestigasyon apan karong gisugdan na kini sa mga polis dili na sila moluwat pa og pamahayag.

“If naa mi gitago dili namo siya pagawson. We are open for an investigation. Dili mi mo middle sa investigation,” matud niya. Matud ni Avila nga tungod kay ang babaye mismo ang migawas sa safehouse awtomatikong dili na siya masakop sa WPP. Niadto pang bulan sa Disyembre 2012 siya nagpuyo sa safehouse. (Bong Soriano ug Mylen Manto/EIM) (BANAT NEWS)