CEBU, Philippines - Ang Bureau of Local Government-Finance (BLGF)-7 regional office mitudlo ni Assistant City Treasurer Tessie Camarillo nga maoy modumala sa Cebu City Treasurer’s Office mentras wala pa aksyoni sa BLGF-Manila ang sugyot ni Mayor Michael Rama.
Si BLGF-7 Regional Director Carmelane Tugas mipadala og suwat ni Mayor Rama nga nagpahibalo nga mentras wala pa’y tubag sa iyang suwat nga gipadala kang BLGF Executive Director Salvador Del Castillo, si Camarillo usa maoy molingkod isip “caretaker.†Makadaghan na nga higayon nga si Camarillo gitudlo nga acting city treasurer. Karon siya na usab ang mopuli ni Emma Villarete nga mobalik ra usab sa daan niya nga pwesto pagka assistant city treasurer for administration.
Gusto ni Rama nga ang itudlo sa BLGF-Manila mao si Ofelia Oliva nga nahimo na nga acting city treasurer kaniadto ug paborito sa mayor tungod sa iyang kaagresibo mangolekta og buhis.
Hinoon, gawas ni Ofelia Oliva, ang mayor mirekomendar pa usab ni Mandaue City treasurer Regal Oliva ug ni Cebu City acting Accountant Diwa Cuevas.
Ubos sa balaud ang mga mayor maoy gihatagan og katungod nga morekomendar og tulo ka “eligible persons†aron itudlo nga treasurer sa ilang territorial jurisdiction. (BANAT NEWS)