20 ka titser mireklamo
CEBU, Philippines - Sobra sa 20 ka mga magtutudlo sa elementary ug high school ang nagpanon kagahapon sa buntag ngadto sa buhatan ni Talisay City Mayor Johnny De Los Reyes ug nangayo og tabang sa ilang problema batok sa ilang superintendent.
Sila mireklamong wala sila hatagi og item tungod kay giingong gisiguro ang mga Teacher Aid Volunteer (TAV) apan dunay TAV sa grupo nga wala usab mahatagi og item.
Kahinumduman nga si Woodrow Denuyo, DepEd Superintendent sa Talisay Division nagkanayon kini nga nagsubay lang usab siya sa kamanduan sa DepEd nga ang mga TAV maoy i-prioritize sa pag-hire nga makasulod sa item. Usa kanila mao si Jeralyn Vinculado kinsa duna na untay item isip Permanent Teacher I ug nagsugod na og tudlo sa grade two nga klase diha sa Talisay City Central School.
Si Vinculado ug uban niyang mga kauban mibutyag nga niadtong Hunyo 10, 2013 nakadawat siya sa iyang assignment order gikan sa DepEd sa Talisay .
Human madawat ang maong order gikompleto na dayon ni Vinculado ang mga rekisitos nga gikinahanglan ug mi-report siya sa tunghaan kung asa siya ma-assign base sa order.
Apan niadtong Hunyo 25, 2013 gipatawag siya ug laing tulo ka prinsipal sa nahisgutang tunghaan ug gipahibawo sila nga ang tanang mga dili TAV ang gipa-pull out sa ilang mga stations hinungdan nga nahibulong sila niini nga unta duna na silay item. Ang maong mga magtutudlo nangutana sa ilang prinsipal sa hinungdan nganong ipa-pullout sila apan giingong ang prinsipal nagkanayon nga ang division office lang ang makatubag niini.
Usa lang si Vinculado sa mga maestrang nahibulong usab sa ilang gidangatan.
Gimando ni De los Reyes kang Talisay City legal counsel Atty. Alfredo Sipalay nga atimanon ang maong problema sa mga magtutudlo. (BANAT NEWS)
- Latest
