Lawas nabulit sa tinigbasan
CEBU, Philippines - Nabulit sa mga samad ang lawas sa usa ka tawo kinsa gipanigbas sa iyang silingan sa sitio Lato, barangay Kalawisan sa dakbayan sa Lapulapu alas 8:00 pasado kagahapon sa buntag.
Ang biktima mao si Retchie Boncales Vivas, 34, minyo, kinsa temporaryo nga nagpuyo sa maong dapit apan lumad nga taga lungsod sa San Miguel sa lalawigan sa Bohol.
Ang suspek nga nagtigbas kaniya mao si Winston Bering Estolano, 20, ulitawo nga nagpuyo usab sa maong dapit.
Si PO2 John Carlo Jocotan nga nahinabi sa Banat News miingon nga nakig-estorya ang biktima kang Jessieboy Estolano nga igsoon sa suspetsado dihang kalit lang kining mitumaw nga nagdala og sundang dayong habas sa biktima.
Ang biktima nga nakalitan sa pagdasmag sa suspetsado nga nagdala og sundang igo na lamang sa pagpanagang sa bukton nga nakaingon sa daghang samad niining naangkon. Ang mga silingan nga nagdali sa pagduol maoy mibadlong sa maong suspetsado busa mikaratil kini og dagan pahilayo sa maong dapit.
Gidala sa Lapulapu City District Hospital ang biktima ug human matambali, gibalhin ngadto sa Vicente Sotto Memorial Medical Center sa dakbayan sa Sugbo.
Si PO2 Jocotan miingon nga ang biktima nga iyang gisukitsukit miingon nga sa miaging adlaw didto gihapon siya sa maong dapit ug maoy gipareglahan sa suspetsado ang barkada niining lalaki.
Dugang pa ni PO2 Jocotan nga ang suspetsado nga gibadlong igo lang mikatawa busa nasukmagan niya kini.
Gituohan nga mao kini ang hinungdan nga gipanimaslan sa suspetsado ang biktima pinaagi sa pagtigbas kaniya. (BANAT NEWS)
- Latest