Binatilyo nangluod sa tiya naghikog

CEBU, Philippines - Usa ka binatilyo  ang  napalgang  patay  gumikan sa paghikog  sa  kaguol  nga  gipasanginlang  nanghilabot  sa  mga  butang sa iyang iyaan didto sa Sitio All Capital QCRO ,barangay Das- Lutopan siyudad sa Toledo niadtong Huwebes sa alas 3:00 sa hapon.

Ang nagpakamatay mao si John Rey Iniceto, 17, ulitawo ug nagpuyo ra usab sa maong dapit.

Kini  subay sa giduso nga spot report gikan sa Das Lutopan Police substation  ngadto  sa operations branch sa Cebu Police Provincial Office (CPPO)  pinaagi ni PO3 Romano Morales.

Si Morales  atol  sa pakighinabi  sa Banat News  nagkanayon  nga ang maong batan-on naguol ug nangluod  human  kini kasab-i sa iyang iyaan , kansang  ngalan  wala  makuha tungod  sa pagkawagtang  sa cell phone  niini ug  uban  pa sulod  sa ilang balay.

Pagkahuman   og  kasaba niini, misud  sa kwarto ang  bayong-bayong ug dayon  nang-lock.

Ang   ginikanan niini misusi paglabay sa pipila ka gutlo   apan  tungod kay sirado ang pultahan nagpatabang kini sa  pag-abli.

Nakugang na lang   sila  dihang pagbukas sa pultahan nakit-an niini nga nagbitay na ang   maong  bayong-bayong  nga  may  pisi  nga  gihikot  sa  liog   samtang   gibaat ang pikas tomoy sa kisame ug wala nay panimuot.

Gisuwayan pa unta nila og hatud sa Carmen Copper Hospital ang maong batan-on apan gideklarar nga DEAD on Arrival (DOA.)

Wala  na lang  usab  mosugyot  ang  kapolisan  og  autopsy  sa patay’ng  lawas  niini. (/WC) (BANAT NEWS)