Kidnapper patay sa shootout

CEBU, Philippines - Usa ka gipasanginlang kidnapper ang napusilan-patay sa mga sakop sa National Bureau of Investigation (NBI)-7 kagahapon sa buntag sa Talisay City samtang usa sa mga staff sa maong buhatan ang naangol sa maong shootout.

Ang namatay mao si Wane Tiano, 30, taga Talisay City kinsa gipasanginlang maoy mastermind sa pagkidnap sa usa ka Overseas Filipino Worker nga si Rene Boy Agraviador niadtong Domingo sa alas 9:00 sa gabii sa Rabaya St., Talisay City.

Si  NBI Regional Director Antonio Pagatpat miingon nga ang asawa ni Agraviador nga si Minerva maoy midangop sa ilang buhatan kagahapon sa buntag ug nangayo og tabang human gikidnap ang iyang bana.

Matud pa nga ang mga kidnappers nangayo og ransom nga P50,000 alang sa kagawasan niini.

Ang mga ahente pinangulohan ni Atty. Jose Ermie Monsanto milusad og operasyon ug gi-setup ang laang batok sa mga kidnappers  nga himuon diha sa Evergreen Cemetery, sa South Reclamation Project (SRP), Talisay City.

Matud pa nga human sa transaksyon, sumala pa ni Pagatpat mipaila dayon ang iyang mga sakop nga sila mga NBI.  Apan matud pa nga inay mo-surrender, mipabuto si Tiano makadaghang higayon ug naigo ang kamot sa usa sa mga ahente nga giila lang sa pangalang Mark kinsa nalandig sa tambalanan.

Diha-diha gidakop sa NBI si Ronilo Roble, 47, nga taga San Roque, Talisay City ug naluwas ang biktima nga si Agraviador ug na-recover ang motorsiklo niini ug ang P50,000 nga ransom money, cellphone nga giingong gigamit sa pag-kontak sa asawa sa biktima.

Nakuha usab ang identification cards ni Tiano nga dunay tatak nga AFP-PNP Unified Security Group.

Samtang ang tulo ka mga suspek nakaikyas sakay sa usa ka motorsiklo atol sa shootout ug padayon karong gipangita sa NBI. Gisusi karon kung bigtime kidnappers ang grupo.

Si Roble kusganong mihimakak sa pasangil kay matud niya wala nila pugsa pagpasakay ang biktima ug wala siyay ideya nga kidnapping diay kadto.

Matud niya kaila niya si Tiano kay kini amahan sa classmate sa iyang anak nga grade one nga nag-eskwela sa publikong tunghaan sa Talisay City. Midugang siya nga gi-contact ra siya ni Tiano aron mo-drive sa motor  apan wala siya masayod sa buhaton niini. Ang mga motor gisakyan sa mga suspects pulos gitaptapan ang mga plate numbers.

Kasong kidnapping for ransom ang ipasaka sa mga suspek karong adlawa. (BANAT NEWS)