Auditor sa poultry company gitulis

CEBU, Philippines - Kapin usa ka gatus ka libo ka pesos ang nasakiyo sa duha ka armadong tulisan nga mitulis sa auditor sa usa ka kompaniya ug karnihan duol sa sementeryo sa barangay Calero sa lungsod sa Liloan niadtong Sabado sa alas 12:30 sa hapon. Ang nabiktima sa pagpanulis mao si Warlito Cabahug, 40, nagpuyo sa Lot 35, Block 3, Villa Lorena-2 barangay San Vicente Liloan ug nagtrabaho isip auditor sa Cardinal Meat and Poultry nga nagbase sa barangay Taboc siyudad sa Mandaue.

Samtang ang mga suspek gihulagway lang nga duha ka mga lalaki pulos armado og kalibre .45 nga armas, nadala sa mga tulisan ang P135,000 mil  nga gidala sa biktima. Matud ni PO3 Jason Gayo, desk officer sa Liloan Police Station sa pakighinabi sa Banat News nagsakay og habal-habal ang biktima paingon na untang mopauli apan pag-abot sa nahisgutang lugar kalit silang gibabagan sa mga tulisan ug gitulis. Way nahimo ang biktima gawas sa pagtan-aw sa duha ka tulisan nga nag-iyahay og dagan pahilayo paingon sa wala matino nga direksiyon samtang siya igo na lang midangop sa kapolisan. (BANAT NEWS)