Dalagita gigapos sa tulisan

CEBU, Philippines - Usa  ka nag-inusarang  tulisan  nga  wala  hiilhi  mibaat  sa baba  human  gaposa  ang  usa ka  dalagita  nga  ilang  gitulis  sulod  sa tindahan  sa  dalan  MC Briones, dakbayan  sa Mandaue  sa miaging  Martes  sa hapon.

Ang  biktima  giila  sa kapolisan  nga  si  Normae Doll Burgas, 15,  dalagita  nga  nagpuyo  sa maong  lugar,            Nahiagom  kini  sa mga bun-og sa iyang nawong ug   sa nagkalainlaing  bahin  sa lawas.     Didto sa buhatan sa  Investigation and Detection  Management Branch (IDMB) sa  Mandaue  gibutyag  sa biktima   nga samtang  nagbantay siya  sa ilang tindahan  kalit  lang miduol  ang  usa ka  lalaki  nga  nagpaka-aron  ingnon  nga kustomer. Apan nakurat  siya  dihang kalit  kining  mition  og  gunting  kaniya   dayong deklarar  nga tulis  ug  gidid-an  siya  sa pagsiyagit  aron  di  mamatay. 

Dihang  misuway  siya  og  lugnot, nasuko  ang  tulisan  ug  gikulata  siya   dayon  mikuha  kini  og plastic cellophane   nga  maoy  gibaat  sa iyang  baba  ug  gigamit  usab  sa paggaid  sa iyang  mga kamot  sa  haligi  sa  ilang tindahan. 

Gani si PO1 Crestito Raboy  sa Mandaue  Police  Station  kinsa  maoy  nag-imbistigar  sa maong  kaso  nagkanayon  nga segun  sa asoy  sa biktima,  una  siya igaid  gipakuob  pa kini  ug  giludhan  ang  buko-buko  hinungdan  nga  puwerting daghana  sa bun-og  niini .

nya  matud  pa  ni  PO1 Raboy  nga  samtang   gipayaka  kini  sa sawog  nga  gigapos  ang  kamot  ug  gigaid  sa haligi, padayon  kining  gitionan  og  gunting  sa tulisan  ug  gibaharan  nga  lubaon  kun  motindog  kini.       Midugang  si PO1 Raboy   nga  samtang  nagtion  kini  sa gunting,  padayon  usab  kining  nanguha  sa mga nagkalainlaing  baligya  ug  mga  butang sa sulod  sa tindahan  nga  naglakip  sa  cell phone  nga  balor  og P5,000; sigarilyo, P2,000; usa ka box  nga  lighter,P250;  ug  cash  nga P300.

Matud  ni PO1 Raboy  nga sa pag-abot sa  apohan  sa biktima  dali kaayong  miikyas  ang tulisan  ug  wala  na  panumbalinga  ang siyagit  niini. Midugang  si   Raboy  nga gibati  og  hilabihang  kapungot  ang apohan  sa biktima  dihang  nakita  niini  ang  naulahi nga nagkurog  sa kahadlok  ug  nabulit  sa  mga bun-og  ang kalawasan  samtang  gigapos  ug gigaid  sa haligi  sa tindahan busa  misumbong dayon  kini  sa kapolisan. (BANAT NEWS)