Gumikan sa nerbyos, mag-uuma naghikog
CEBU, Philippines - Usa ka mag-uuma nga nag-antus sa nervous breakdown miunay og tapos sa iyang kaugalingon sulod sa ilang lawak sa sitio Cantipla Brgy. Tabunan dakbayan sa Sugbo sa miaging hapon.
Ang nagpakamatay sa iyang kaugalingon giila nga si Renato Claros, 37, minyo, lumolupyo sa maong dapit.
Matud ni Mary Joy Claros, 8, anak sa biktima nga sa wala pa maghikog ang iyang amahan, iya pa kining nakit-an nga nagbaid og kutsilyo.
Unya tungod kay gisugo kuno siya pagpaapas sa iyang inahan busa milakaw ang bata , apan sa iyang pagbalik sa ilang balay maoy iyang nakita nga nagbitay na ang iyang amahan sulod sa ilang lawak nga wala nay kinabuhi.
Hinungdan nga mibalik siya sa agi ug dihang nasugatan niya ang iyang inahan nga si Leony Claros, hingkod, iya dayon kining gisultihan sa nahitabo sa iyang amahan.
Sumala sa pamahayag ni Leony ngadto sa kapolisan, nabantayan kuno niini ang iyang bana sa milabay nga semana nga magpunay og yawyaw bisan siya rang usa. Matud pa ni Leony nga nadunggan niya sa estorya sa iyang bana nga may tawo kunong buot mopatay kaniya hinungdan nga nahadlok na kini nga mogawas sa ilang balay.
Apan nasabtan kini ni Leony tungod sa gihambin nga nervous breakdown sa iyang bana.
Si SPO4 Rey Cuyos sa homicide section sa Cebu City Police Office nagkanayon nga nakuha nila ang nylon nga pisi nga gihikot sa liog sa biktima samtang ang pikas tumoy niini didto igaid sa sagbayan sa ilang balay.
Nakuha usab nila ang duha ka kutsilyo nga pulos 30 sentimetros ang katas-on nga ang usa may dugo pa.
Gawas sa luto sa pisi sa iyang liog samdan usab sa walang dughan ang biktima pinaagi sa kutsilyo nga iyang giunay og duslak niini.
Nagpaabot usab sila sa resulta sa autopsy aron masayran kung wala bay laing tawo nga miamong-among sa kinabuhi niini. (BANAT NEWS)
- Latest
