“Cybersex” den gironda sa NBI

CEBU, Philippines - Usa ka 3-door apartment ang gironda sa mga sakop sa National Bureau of Investigation-7 kagabii batok sa usa ka gidudahang cybersex den sa dalan A. Lopez sa barangay Labangon nga gi-operate sa usa ka Australian national.

Sumala pa sa kasaligang tinubdan sa Banat News nga nakakuyog sa maong pagpangronda, ang maong 46-anyos nga Australian gireklamo sa tulo ka mga babayeng kanhi trabahante niini ug mibutyag nga nag-operate kini og cyber sex operation.Ang mironda sa maong apartment gipangulohan ni Atty. Rey Villordon human makadawat sa maong reklamo.

Ang Australian (pangalan di pa ikabutyag) nga taga Sydney nadakpan sa maong operasyon. Apan kini mipasangil sa mga reklamante nga maong iyaha silang gitaktak tungod kay nangawat kini kaniya.

Sumala pa sa tinubdan, ang ronda miresulta sa pagkaluwas sa onse ka mga kababayen-an diin upat kanila gituohang mga menor de edad kay gibanabanang nag-edad pa sila og 12, 13, ug duha ka 14-anyos.

Ang suspek matud pa  nangangkong ‘book keeping’ ang negosyo nga iyang gi-operate. Sumala pa sa tinubdan, gawas sa mga nakuhang computers duna say mga sex toys, condoms ug Viagra ang nakuha diha sa maong apartment. Atol ning pagsulat sa balita, ang NBI nagpahigayon pa og imbentaryo sa mga ebidensya nga nakuha diha sa maong apartment. (BANAT NEWS)