Rama gipasakaan og kaso sa BOPK

CEBU, Philippines - Ang Bando Osmeña Pundok-Kauswagan (BOPK) mipasaka og duha ka kaso batok ni Mayor Michael Rama diha sa Office of the Ombudsman-Visayas ug sa Commission on Elections.

Kaso nga paglapas sa Republic Act 6713 kon Code of Conduct and Ethical Standards for Public Officials and Employees ang gipasaka diha sa Ombudsman.

Kauban ni nga gipasakaan og kaso mao sila si City Hall public information officer Carlo Dugaduga,  PIO staff Eli Espina, Simeon Romarate ug Jeffrey Cantilla nga matud pa pulos kawani sa City Hall.

Si Apas Barangay Captain Ramil Ayuman giapil sa pagkiha sa Ombudsman kay kabahin siya sa mag-programa sa radyo sa DYLA matag alas-3 sa hapon bisan og ang programa dili binayran sa City Hall nga giingong magdaut sa kontra ni Rama.  Gihulagway ni Rama nga daw “natarantar” na ang iyang kontra.

 Gitabangan sa BOPK ang duha ka senior citizens nga maoy mireklamo sa mga broadcasters sa City Hall. Sila si Ayuman, Espina ug Romarate miingon nga wala usab sila mahadlok sa kaso ug dili sila moundang sa pag-broadcast sa programa nga binayran ni Rama.  Ang reklamo mao nga samtang gibayran sila si Romarate, Espina ug Cantilla apan giibanan nila ang oras nga ilang tingtrabaho para sa gobiyerno.

Sa laing bahin, ang kaso nga kalapasan sa lagda Comelec Resolution 9615 gipasaka didto sa Commission on Elections batok ni Rama, sa Team Rama ug ni Atty. Collin Rosell nga maoy hepe sa Division for the Welfare of Urban Poor (DWUP).

Kini kabahin sa pagbitay og tarpaulin sa pultahan nga bahin sa DWUP office nga nahimutang sa ikaduhang andana sa City Hall nga adunay marka “We support Mayor Michael Rama and Team Rama.” Ang tarpaulin gibutang aron sa pagpahibalo sa programa sa dakbayan kabahin sa pagtabang sa mga kabus nga lumulopyo nga makaangkon og koneksyon sa VECO sa sayon nga pamaagi. (BANAT NEWS)