Mabdos patay sa ambush

CEBU, Philippines - Patay ang usa ka mabdos nga giingong kapuyo sa mayor samtang angol usab ang igsuon sa mayor nga konsehal usab sa lungsod sa Pio V Corpuz sa Masbate human gipamusil diha sa eskina sa dalan Sotto ug Osmeña Blvd. sa barangay Tinago ning dakbayan.

Ang biktima nailhan nga si Crisanta Lauro, 39, giingong kapuyo ni Mayor Hermigildo Betonio III ug Leny Betonio Eser, usa ka municipal councilor sa Pio V. Corpus, Masbate.

Sa pasiunang imbestigasyon sa kapolisan nasayran nga ang duha ka biktima bag-ohay pa lang nga naabot sa Pier 3 gikan sa Masbate ug sakay og taxi nga gimaneho sa usa ka Gilbert Bernito patubang sa Talisay City. Apan pag-abot sa traffic light sa maong dapit usa ka motorsiklo nga adunay sakay nga duha ka tawo ang mipaduol kanila ug sa kalit lang mipusil ngadto sa mga biktima.

Tungod niini gipabulhot ni Bernito ang taxi aron makalayo sa mga gunmen apan gisundan sila og paulan og bala hinungdan sa pagkagusbat sa luyong samin sa bintana sa taxi.

Si Bernito diretsong milahos sa Chong Hua Hospital aron matabang ang duha ka biktima apan giingong patay na si Lauro tungod sa igo sa ulo ug dughan samtang si Eser naigo sa iyang walang kamot.

Matud pa ni PO3 Geoffrey Gutual sa Homicide Section, Cebu City Police Office,  si Eser mibutyag nga grabe kaayo ka-init ang politika sa ilang dapit.

Usa sa gitutukan sa imbestigasyon sa kapolisan mao ang anggulo nga kalambigitan sa politika ug gisubay usab ang lain pang anggulong personal sa maong krimen. 

Dugang pa ni Gutual nga iyang nahinabi ang mayor sa Pio Corpuz   ug mihangyo kini og police escort kun moanhi kini sa tambalanan diin gidala ang iyang kapuyo ug igsuon.

Gibutyag ni Gutual nga susama sa nahadlok ang mayor nga unya balikan siya sa mamumuno nga mitira sa mga biktima.  Nasayran usab sa kapolisan pinaagi sa ilang nakuhang impormasyon nga nagsabak diay og duha ka bulan ang namatay nga biktima.

Sumala pa usab ni PO3 Ruel Victor Ayuman sa Homicide Section nga planado kaayo ang pag-atake.

Nagduda silang posibleng dunay kontak ang gunmen diha sa barko nga nag-monitor sa lihok sa duha ug nakig-coordinate ngadto sa gunmen.  (BANAT NEWS)