Revenue officer sa BIR gitaktak tungod sa ‘pagbulsa’ sa P.2M

CEBU, Philippines - Gipalagpot gikan sa serbisyo ang revenue officer sa Bureau of Internal Revenue (BIR) District 82, dakbayan sa Sugbo human kini mapamatud-ing "guilty" sa kasong administratiba nga serious dishonesty.

Ang graft investigation and prosecution officer sa Ombudsman Visayas nga si Maria Regina Fernandez mipalagpot kang Mae Cheryl Enguio gikan sa serbisyo human kini mapakyas sa pag-uli sa P202,500 nga bayad sa buhis sa nahalin nga condominium sa usa ka Francis Fabian Borromeo.

Ang maong condominium ni Borromeo nahimutang sa City Lights Garden Tower II sa barangay Lahug, dakbayan sa Sugbo ug gibaligya niya kini og P4.5 milyones ngadto sa RAF Realty Enterprises.

Ang nakapalit sa maong condominium mao si Rosalia Foulds kinsa buot dayon mabalhin sa iyang pangalan ang titulo sa maong unit.

Usa sa rekisitos sa pagpabalhin sa ngalan sa titulo mao ang pagbayad og buhis ngadto sa BIR. Si Borromeo nagkanayon nga mihatag siya og P202,500 ngadto kang Enguio isip bayad sa buhis ug uban pang mga rekisitos sa BIR.

Apan nakugang na lang siya dihang niadtong Marso 2010 nakadawat siya og suwat gikan sa BIR nga nagpahimangno kaniya nga wala siya makabayad sa capital gain tax nga P520,312.05 sa pagbaligya niya sa iyang condominium.

Niadtong Septiyembre 2010 si Borromeo nakadawat usab siya og mensahe sa text gikan sa buyer nga nagpahibawo kaniyang ang BIR Special Investigation Division nangayo og mga dokumento kabahin sa iyang pagbaligya sa condominium.

Si Enguio napakyas usab kini sa pagduso og counter affidavit ug pagtambong sa hearing sa kaso batok kaniya samtang nasuta usab ni Fernandez nga dili awtorisadong manawat og bayad sa buhis gikan sa mga magbubuhis. Nasuta usab nga mi-resign na sa serbisyo si Enguio. (Brenda D. Batuto ug Mylen P. Manto sa The Freeman/EIM) (BANAT