Manghud giunay og tigbas sa maguwang
CEBU, Philippines - Natabas ang bukton sa manghud human kini unaya og tigbas sa iyang maguwang gumikan lang sa panaglalis bahin sa puso artesiano didto sa Sitio Langob, Brgy. Poblacion dakbayan sa Lapulapu sa milabay’ng adlaw.
Ang biktima mao si Aurora Estopa, 49, minyo, ug residente sa maong dapit, samtang ang mitigbas kaniya mao ang iyang maguwang nga si Allan Estopa, 53, minyo ug residente usab sa maong dapit.
Sa pasiunang imbestigasyon sa kapolisan nasuta nga sa wala pa ang pagpanigbas naglalis ang biktima ug ang suspek tungod sa kapakyas sa suspek sa pag-ayo sa puso artesiano sa ilang lugar.
Matud pa giakusahan ni Aurora iyang maguwang nga gituyo niini nga wala ayuha ang ilang puso aron wala nay makakuha og tubig sa ilang dapit.
Apan nangatarungan ang suspek nga wala siya’y kuwarta busa wala niya maayo ang maong puso.
Gumikan niini miinit pag-ayo ang ilang lalis nga misangpot sa pagkuha sa suspek og guna dayon gitigbas ang biktima.
Ang biktima nga nasabak sa bukton gihatud dayon ngadto sa tambalanan sa dakbayan sa Lapulapu apan gibalhin usab dayon kini ngadto s a Vicente Sotto Memorial Medical Center sa dakbayan sa Sugbo.
Samtang ang biktima dali usab nga mitahan sa iyang kaugalingon ngadto sa kapolisan ug kasamtangang gibalhug sa detention cell. Nagpaabot ang kapolisan nga mopasaka og kaso nga “frustrated parricide†ang biktima batok sa iyang maguwang nga suspek. (/WC)(BANAT NEWS)
- Latest
