Mga opisyal naglalis atol sa cash assistance distribution
CEBU, Philippines - Taliwala sa kahapsay sa pagpang apud-apud sa senior citizens cash assistance kagahapon sa south district, miulbo usab ang panaglalis tali nila ni Market Operations Division head Racquel Arce ug Cogon Pardo Kapitan Eugenio “Jun†Gabuya, Jr. tungod kay wala sila magkasinabot sa physical arrangement sa venue.
Apan human ang pipila ka minutos nga panaglalis, gipadaplin una sa duha ang mga deperensya ug gipadayon ang paghatag sa financial assistance.
Gikasuko sa kapitan ang pag-usab sa ilang giandam nga lamisa ug lingkuranan sa mga taga city hall tungod kay ila kuno kining gihaguan.
“Nabuntagan intawon ang akong mga tawo aron lang ma-arrange ang lingkuranan ug lamisa. Kapila na mi nakasuway og distribution so suhito na mi’g unsaon ang sistema. Usa pa, nakig-coordinate man mi sa Office of Senior Citizen Affairs (OSCA) sa wala pa ang distribution,†pamahayag pa ni Gabuya.
Dugang niya, sila nakuratan na lamang dihang giusab nila ni Arce ang ilang giandam.
“Wala man gani na sila (Arce) nagpahibawo namo nga sila diay ang moanhi ug mo-distribute sa cash assistance. Ang among nahibaw-an nga ang OSCA ug treasurer’s office ang among kauban sa pagpanghatag,†midason ang kapitan.
Si Arce mipasabot nga isip department head, siya gimanduan ni Mayor Michael Rama nga mangulo sa distribution sa Cogon Pardo.
Matud niya, ilang giusab ang arrangement sa lamesa ug lingkuranan tungod kay ang giandam sa barangay igo lang sa upat ka disbursement officers (DO) apan duna silay 12 nga gitahasan aron dali silang mahuman.
Ang ilang pagsulod nga wala’y pirmiso gikan sa kapitan gikasuko pag-ayo ni Gabuya.
“Ang ako lang ba nga duna unta ta’y insaktong pamatasan. Respeto lang gud. Gihaguan gud na. Magpahibaw unta sila daan nga mao diay na ilang buhaton. Mao ra na akong gikalainan nila,†matud sa kapitan.
Si Arce miangkon sa iyang sayop nga wala siya nakapananghid sa kapitan apan mitataw nga ang ilang tumong ra gyud mao ang serbisyo. (BANAT NEWS)
- Latest
