Vigilantes mopuo sa financier sa masiao?

CEBU, Philippines - Ingon sa adunay mga armadong tawo karon nga misugod na paghimo’g estrikto nga kampanya batok sa mga tawo nga nalambigit sa illegal nga sugal, ilabi na ang masyaw.

Wala mahibaw-i sa kadaghanan nga girakrakan ‘sab diay og mga bala ang ganghaan sa balay ni Randy Bulibuli ug gibutangan og paskin ang iyang “gate” nga pahunongon na siya sa masyaw.

Ang pag-angkon ni Bulibuli iyang gihimo duha ka adlaw human nga si Edgar Lim, laing gidudahan nga financier sa masyaw, gipusil sa wala hiilhi nga mga tawo samtang nagsakay sa iyang sakyanan.

Samtang wala pa moangkon si Lim nga financier siya sa masyaw dinhi sa Sugbo apan nadakpan na kini sa kapolisan nga mihimo’g kampanya batok sa illegal number’s game.

Si Bulibuli mikontak sa cell phone number niining reporter nga gipublikar sa mantalaan ug miangkon nga nalambigit usab siya sa sugal nga masyaw, apan matud niya miundang na siya niadtong Pebrero 1.

Miingon si Bulibuli nga nakasabot siya nga duna g’yuy mga tawo nga mohimo’g kampanya batok sa mga nalambigit sa masyaw ug mao nga gipauwanan og mga bala ang iyang gate sa balay.

Ang bala milapos sa sin nga “gate” ug miigo pa sa duha ka sakyanan ni Bulibuli.  Gibutyag usab ni Bulibuli nga ang balay nga gipuy-an ni Lim, giitsahan usab og granada apan gihilom lang.

 Si Bulibuli nga taga Pasil personal nga nakigkita ni Police Regional Director Marcelo Garbo ug Intelligence Chief Paul Labra didto sa Camp Sergio Osmeña Sr. aron sa pagpahibalo nga wala na siya mag-finance og masyaw.

Gibutyag ni Bulibuli kun kinsa ang financier sa masiao nga wala gayud mohunong.

Gani ang iyang mga usher kaniadto nagpadayon gihapon apan tua na   magremitan sa laing financier.

Matud ni Bulibuli nga duha ang gikuhaan og numero nga dag-an sa mga mopusta.  Kini mao ang local nga resulta ug ang gikan sa Manila.

Si Lim nagluwan sa iyang sakyanan gikan sa SRP Coastal Highway dihang gipusil sa mga tawo nga matud pa nagsakay og motor ug anaa pa siya karon sa ospital. (BANAT NEWS)