“Mastermind” Korean carnap syndicate nadakpan

CEBU, Philippines - Nasikop na gyud sa kapolisan sa dakbayan sa Mandaue ang tulo ka mga Korean nationals nga maoy gitumbok nga utok sa usa ka carnapping syndicate nga naglihok dinhi sa Metro Cebu.

Si Kim Kyung Hwan, 33, nga taga  El Dorado Subdivision sa Brgy. Banilad, Mandaue City, ug operator sa Junghap Car Distributor sa Cabangcalan ang nasikop sa hiniusang pwersa sa City Intelligence Bureau; Investigative and Detective Management Bureau (IDMB) ug sa  Casuntingan Police Station sa  Mandaue City Police Office niadtong Miyerkules sa hapon sulod sa iyang car display shop.

Nadakpan ang laing duha ka suspetsado nga business partners ni Kim nga naila nga sila si  Won Sheok Lee, 32, ug Jang Hyun Lee, 33, nga naghupot og tourists passports ug temporaryong nagpuyo sa Agro-Macro Subd.  Cabancalan.

Ang duha nasikop usa ka oras human nga masikop si Kim didto sa bodega diin gipangtaguan ang mga kinawat nga mga Starex vans. Ang tulo nasikop sa kapolisan human usab sila makit-i sa tulo ka mga polis nga mi-responde didto sa Cabangcalan ug Casuntingan  human sila makadawat sa taho nga adunay presensya sa mga Starex van nga gipang–abandonar sa nagkadaiyang parte sa barangay

Ang tulo ka Koryano, nakit-an sa kapolisan nga misakay sa usa ka  Silver Grey Starex van nga adunay  plate no. JEH 875   ug gipanag-iya ni  Engr. Francisco Perater  nga ilang gi-abandonar sa Villa Therese Subdivision sa barangay Casuntingan.

Si Supt. Josefino Ligan, hepe sa City Intelligence Bureau nagkanayon nga ang tulo mao gyud ang mastermind sa sunod-sunod nga pagpangarnap dinhi sa Sugbu.

Nagduda si Ligan nga ang duha maoy nagdala sa duha ka mga Koryano nga una nang nadakpan sa Regional Special Operation Group sa PRO-7.

Atol sa imbestigayon mihimakak ang tulo ka Koryano sa ilang kalambigitan sa carnapping.

“Natural nga mo deny dyud sila. But since there was a positive identification that they were the ones who boarded the abandoned stolen vehicle, I think it will suffice in the filing of the case,” matud pa ni Ligan.

Dugang pa usab ni Ligan nga mitakdo  ang mga pamahayag sa duha ka mga unang nadakpan nga sila si Kim Jae Young ,42 ug  Hong Seo Yong, 32, nga ang ilang mga mastermind maoy namaligya sa ilang mga kinawat nga awto ngadto sa ilang mga prospected buyers diha sa Cabangcalan.

Nasayran nga ang  Junghap Car Distributor gipanag-iya ni Kim Kyung Hwan ug gigamit niya  nga “dummy” ang iyang manager nga si Roldan Alesna.  Si Alesna mipatim-aw kagahapon sa IDMB aron sa paglimpyo sa iyang pangalan nga wa siyay kalambigitan ug nahibaw-an sa illegal nga kalihukan sa iyang amo.

Nasuta usab nga si Kim maoy nag-abang sa warehouse 11 diha sa Castillex compound diin gipangtaguan ang nahisgutang mga kinawat nga sakyanan. Usa ka guwardiya sa maong compound mikompirmar nga didto gipanaguan ang nahisgutang mga sakyanan sa wa pa kini gipang-abandonar niadtong Miyerkules sa buntag .

Sa dihang gi-raid ang nahisgutang warehouse nakompiskar ang “dismantled parts” sa usa ka Starex van samtang laing duha usab ka Starex van ang nakompiskar kagahapon sa buntag nga wa nay mga plate numbers didto sa car display ni Kim.

Samtang gipahigayun ang raid didto sa warehouse miabot ang duha ka mga Koreano nga sila si Won Sheok Lee ug Jang Hyuan Lee, nagtuo ang kapolisan nga posibling wa masayod ang duha nga adunay raid nga gihimo sa warehouse.

Si Ligan nagkanayon nga si Engr. Perater mipasaka na og kasong carnapping batok sa tulo ka mga Koreano kagahapon sa hapon sa buhatan sa piskalya .

Ang laing Korean national nga si Seung Dong Park ang mipatim-aw sa buhatan sa  IDMB ug nagdala og mga dokumento aron pagpahibawo usab nga iyang Starex van nga gi-parking sa Basak, Lapu-lapu niadtong Enero 13 ang gikawat usab.   (BANAT NEWS)