Sugbo bag-o’g provincial Comelec supervisor

CEBU, Philippines - Gipaabot nga mo-asumer na sa katungdanan ang bag-ong Provincial Comelec Supervisor sa Sugbo   nga si Atty. Eddie Abba karong buntag isip hulip ni outgoing provincial Comelec Supervisor Atty. Lionel Marco Castiliano .

Si Castillano adto  ilabay   sa lalawian sa Bohol  isip kabahin  sa reshuffle  nga  ipatuman  sa Comelec  matag  panahon  nga magsingabot  ang election.

Matud ni Castiliano   nga   nahinabi sa Banat News  nga sa miagi pang  semana  nadawat nila ang Comelec resolution   nga nagpatuman   sa  lahugay sa tanang mga provincial election supervisor ,apan niini  pang semanaha  ipa-implementar  ang  maong  reshuffle.

Busa  nakahigayon  pa  siya sa paghuman sa daghan  niyang  mga  gimbuhaton  sa opisina  sumala  ni  Castillano.

Midugang  siya  sulod  usab  niining semanaha ipatuman  ang revamp sa mga Election officer sa mga kalungsoran ug dakbayan   ug  ipamalhin usab kini og destino aron paglikay sa   mga  alegasyon sa pagpanikas ug pagpabor-pabor  og  mga  kandidato sa  panahon sa eleksiyon.

Hinuon namiligrong malabay sa layo nga lugar kadtong mga election officer nga nag-atubang og daghang reklamo aron malikayan ang  dugang katahap batok   kanila.

Niadtong miaging semana  gipatawag ang mayoralty candidate sa lungsod sa Sta. Fe nga si Jose “Titing” Esgana sa buhatan sa Comelec sa Kapitolyo ug gipapanumpa  bahin sa iyang giduso nga petisyon batok ni Santa Fe Election officer Neriza Gegante.

Sunod nga gipatawag  mao si Rizalino Esgana tagalungsod gihapon saSta.  Fe  kinsa  gipapanumpa  usab   bahin sa iyang petisyon batok  gihapon  ni Gegante.

Segun  sa unod  sa ilang  petisyon, ilang  gihangyo  ang  Comelec  nga  ipalabay   sa gawas  sa isla sa Bantayan  si Gegante human nila kini pasanginli nga mipabor sa kampo ni  Mayor Jinnefer Illustrisimo  sa maong  lungsod.

Ang maong petisyon gisuportahan sa gatosan ka mga molupyo sa di mominus  upat ka mga barangay sa lungsod sa Sta Fe. Ilang katarungan mao ang pag-silbing Election officer sa lungsod ni Gegante  sa mikapin   na sa  napulo ka tuig  ug ang inahan niini nga si Poblacion barangay captain Oling Gegante, maoy campaign leader sa mga Illustrisimo.  Gawas niini nagsilbi pa kining board of director sa Bantayan Electric Company (BANELCO) nga matud pa sa mga petitioner gamitong taming aron  sa paghaylo sa mga kunsomidor sa kuryente pagbotar   sa kandidato niining  paluyohan. (BANAT NEWS)