Mga nurse sa Mandaue may allowance

CEBU, Philippines - Gihangop sa mga bag-ong registered nurse kinsa  boluntaryong miserbisyo sa Mandaue City Hospital ang lakang  sa konseho sa  maong dakbayan nga makadawat  sila og  allowance   gikan sa kagamhanan.

 Matud pa  nila nga  dako kaayo kini og ikatabang sa  ilang  inadlaw-adlaw  nga  mga  gasto  sama  sa plete  ug  pagkaon.

Kining  ilang  pagserbisyo  sa tambalanan  sa Mandaue  ug  sa City Health Office   maoy  bahin  sa ilang  pagbansay-bansay  sa  natad  sa ilang  kurso  aron  ang  gitudlo  kanila  nga  mga teyoria s a eskuylahan  ika-apply  nila  nga aktuwal sa  mga pasyente  sa tambalanan.

Inig human  sa ilang  serbisyo  sa tambalanan  sa Mandaue,  ang maong  kasinatian  makatabang  na  kanila  aron inig graduwar  nila  makapangaplay  na  sila  og  trabaho  sa mga dagkong  hospital  dinhi  sa nasud  ug  ilabi  na  sa gawas  sa nasud.

Samtang si Mandaue City Councilor Demetrio Cortes Jr.   mipasabot  pinaagi  sa ordinansahon  nga  iyang  giumol ang  igahin  nga salapi alang sa allowance  sa maong  mga nurse  kuhaon  gikan  sa gahin  sa Mandaue City Volunteer  program.

Kun kaaprobahan  ang maong ordinansahon   makadawat   ang maong mga volunteer  nurse  og P20  matag oras nilang serbisyo. 

Gisugyot  ni Cortes  ang  gahin nga   P800,000  nga maoy kuhaan sa allowance sa matag volunteer nga moserbisyo  sa tambalanan sa dakbayan.

Dugang pa niya nga ang maong gahin  adto itibhang sa sobrang  pundo sa  tuig 2012. (BANAT NEWS)