Sogod mihatag P1 milyon sa kapolisan

CEBU, Philippines - Kagamhanan sa lungsod sa Sogod sa Probinsya sa Sugbo mihatag og P1 milyon ngadto sa Police Regional Office-7 aron makatabang sa katukoran sa bag-ong buhatan sa kapolisan sa maong lungsod.

Si Mayor Lissa Marie “Moonyeen” Durano-Streegan mao gayud ang nangunay sa pagtunol sa tseke nga P1 milyon ngadto ni Chief Supt. Marcelo Garbo, Jr. ang hepe sa kapolisan sa tibuok Central Visayas.

Matud pa ni Mayor Duran-Streegan nga ang kagamhanan sa lungsod miila sa dakong gimbuhaton sa kapolisan alang sa kalambuan sa ilang lungsod hinungdan nga mitabang ang iyang administrasyon sa ilang panginahanglan.

Gawas sa P1 milyon, ang lungsod mao usab ang mihatag sa luna nga gitukoran karon sa bag-ong buhatan sa kapolisan tapad ra usab sa munisipyo.

Moabot ngadto sa P5 milyones ang gahin sa maong buhatan sa kapolisan nga gikan sa Kampo Krame ug miabag ang lungsod pagtukod niini.

Nagkanayon si Mayor Durano-Streegan nga daghan kaayo og mga programa ang lungsod sa pagkakaron ilabi na ang pagdani sa mga negosyante ug pagpalambo sa turismo.

Nagkinahanglan ang lungsod og tabang gikan sa kapolisan aron sa ingon mapadayon ang kahusay ug kalinaw sa maong lungsod, dugang pa ni Mayor Durano-Streegan.

Ang buhatan sa kapolisan sa lungsod naa ra ubos nga bahin sa munisipyo ug mao kini ang sagad mahitabo sa uban usab nga lungsod.

Si Garbo sa iyang bahin mipaabot sa iyang pasalamat ngadto sa mayor ug sa mga opisyales niini sa dakong tabang sa kapolisan. (BANAT NEWS)