Wanted sa Zamboanga nasikop sa Mandaue

CEBU, Philippines - Nasikop  sa kapolisan  sa dakbayan  sa Mandaue  ang usa ka most wanted criminal sa Zamboanga del Sur  didto  sa barangay  Labogon sa maong  dakbayan  niadtong  Lunes.

Ang  mga  kapolisan  sa Basak Police Station  sa Mandaue City Police Office maoy  misikop  kang   Eleazar Pecalioga, hingkod  nga taga lungsod sa Dumalinao sa probinsya sa Zamboanga del Sur.        

Si Pecalioga didto  sa balay  sa  iyang igsoon sikopa  sa kapolisan  nga nagdala  og  warrant of arrest sa kasong murder nga  iyang  giatubang  nga nahitabo niadto pang Pebrero 2012  didto sa lungsod sa Dumalinao.        Nasayran  gikan ni  Sr./Insp Wilson Abot, hepe  sa Basak Police Station   nga si Pecalioga nalutsan og warrant human pusila  niini ang usa ka Bienvinido Codilla.       

Kini  gumikan  lang  sa giingong  lalis  bahin  sa yuta  ug si  Pecalioga matud pa maoy gisugo sa pagpatay sa biktima segun sa anak niini nga usa ka engineer sa iyang pagpakighinabi kang Abot.        Human sa kamatayon ni Codilla ang suspek  milayas  ngadto  sa kaulohan  ug  didto  magtago-tago   unya  mibalhin  kini  nganhi  sa Sugbo  ug  may  usa  na  ka  buwan  kining  nagpuyo  sa balay  sa iyang  igsoon  sa Labogon. Matud pa ni Abot nga dali nilang  nasikop  ang  suspek tungod  kay   matag semana ang barangay mopahigayon man og census sa mga bag-ong  mopuyo  isip  pagtuman  sa  iyang hangyo. Mipasabot  si Abot  nga  iyang  gituyo  pagpatuman  kining  census  aron  dali  ra nilang  masulbad  kun may  krimen  nga  mahitabo  sa maong  barangay  nga  ubos  sa iyang  hurisdiksyon.

Usa  sa mga mikuyanap  nga krimen  sa maong  lugar  mao  ang  tulis.  Matud pa ni Abot nga ilang gisabotan  karon  ipakuha  ba  nila  sa  kapolisan  ang  maong dinakpan  o kaha  sila mismo  maoy  mohatud  niini  ngadto  sa Zamboanga del Sur. Ang  dinakpan  kasamtangang gitanggong sa prisohan  sa  Basak Police Station. (BANAT NEWS)