Tag-iya sa tolda gipugos sa kapolisan pagpirma og quit claim?

CEBU, Philippines - Ang mga tag-iya sa mga tolda  nga giguba sa mga kapolisan  sa atubangan sa Kapitolyo sa miakusar  sa kapolisan  nga  mipugos  kanila  sa pagpapirma  og acknowledgement  receipt and quit claim  didto  sa opisina  ni acting governor Agnes Magpale.

Kini ang gitug-an   ni Atty. Christina Garcia Frasco, anak  ug  usa  sa  mga abogado  ni suspended  governor Gwendolyn  Garcia.

Gani matud  pa  ni  Frasco  nga  ang  acknowledgment receipt and quit claim  wala pa pirmahi ni Oscar dela Calzada usa  sa  mga tag-iya  sa mga tolda  nga  gigusbat  sa kapolisan  kay naglagot  sa pagdumili  kuno  ni   Magpale  sa pag-uli  kanila  sa ilang  mga  tolda  nga  nakadaot  pag-ayo  sa ilang  negosyo. Ang  maong  mga  tolda maoy  gigamit  sa mga suporter  sa suspendidong  gobernador  nga  nagtampunsisok  sa atubangan  sa Kapitolyo  niadtong  Disyembre  19, 2012  atol  sa pagkasuspenso  ni  Garcia.

Samtang  gipasabot   ni Frasco  nga ang pagpugos sa pagpapirma sa tag-iya sa  mga tolda  sa nahisgutang claim aron ma-release na ang maong butang, maoy usa ka tataw nga pagpakita sa "obstruction of justice" .

Nasayran  nga  ang  maong  mga tolda  maoy  usa  sa mga buhing ebidensiya sa kasong robbery nga gipasaka sa iyang igsoon nga si Paolo Garcia batok kang Magpale ug PRO-7 Regional Director Marcelo Garbo uban sa mga sakop  nga kapolisan niini nga hangtud karon padayong  gi-imbestigar sa Cebu city prosecutor’s office.

Gitumbok ni  Frasco nga ang gihimo sa acting governor klaro ug tataw nga pag-angkon  nga nakahimo   kini og krimen  sa pagkawat sa nahisgutang mga  tolda ug nagpakita nga nahadlok sa kaso ni Paolo Garcia. Dugang pa ni  Frasco nga  ang kopya sa acknowledgment receipt and quit claim nga papirmahan ni dela Calzada ilang ilakip sa lain nilang manifestation ngadto sa piskalya nga mao unya ang makapasamot sa paglig-on sa ilang kaso batok ni Magpale, Garbo ug kaubanang polis.

Sa bahin  ni  Garbo  ug  sa kaubanang  mga  polis  niini, lakip  si  Magpale,  ilang  gipasalig  nga   andam  nilang  atubangon  ang  mga  kiha  nga  gisang-at  batok kanila. Matud  pa  sa kapolisan  nga adto  na  sila  sa korte  mohatag  sa ilang  tubag sa maong  mga pasangil. (BANAT NEWS)