“Hitman” sa gang sa Lapulapu nadakpan

CEBU, Philippines - Human sa pipila ka bulan nga pagtago-tago nasikop sa kapolisan ang usa sa most wanted sa siyudad sa Lapulapu tungod sa mga krimeng nahimo niini sa Brgy. Pusok sa maong dakbayan.

Nadakpan niadtong nakalabay’ng gabii si Geraldin Orejada, 24, residente sa Sitio Mustang, sa nahisgutang barangay nga nag-atubang og kasong murder ug mga kasong robbery.

Matud pa ni Lapulapu City Police Office Director Sr. Supt. Rey Lyndon Lawas usa sa kaso ni Orejada mao ang pagpusil patay ni Rowen Pino sa ilang dapit atol sa ilang panag-inom pagkahuman sa street party sa "Kadaugan sa Mactan" sa milabay’ng tuig.

Nasuta usab sa kapolisan nga si Orejada maoy gitumbok nga usa sa mga hitman sa usa ka gang ug pipila sa mga gipamusil nga sakop sa karibal nga grupo siya maoy gitumbok nga gunman.

Gipasanginlan usab si Orejada nga responsable sa pagpanulis nga magsakay og motorsiklo.

Gipaabot na lang sa kapolisan ang mando sa korte sa pagpabalhin kaniya ngadto sa Lapulapu City Jail. (/EIM) (BANAT NEWS)