Soc midepensa ni Joavan

CEBU, Philippines - Si  Joavan Fernandez,  nakatampo  og  tabang  sa  Department of Environment and Natural Resources (DENR) sa pagpanikop niini sa  mga  tigpangarga   og bas , graba ug kahoy matud ni Mayor Socrates Fernandez  ang nagsagop  kang Joavan.

Ang  pamahayag  ni  Fernandez  gihimo agi  og  tubag  sa mga  reklamo  sa pipila ka negosyante  og bas ug  graba  kinsa gipanikop  ni Joavan  sa miaging  adlaw.

Sila  si Jovey Salazar ug Julius Abad misumbong   sa kapolisan  kay  gidakop  kuno  sila  ni Joavan  bisan  kompleto  sila og  mga papeles   sa  pagpanghakot  og bas ug graba  gikan  sa  sapa  sa Mananga.

Si Fernandez nga nahinabi sa mga tigbalita kagahapon mibutyag nga si Joavan maoy iyang gi-deputized nga mangulo sa Vanguard sa siyudad.

Matud sa mayor nga si Joavan daku og natabang sa DENR sa pagpanikop   sa  mga  malapason  tungod  kay  may balaod  na  ang  kagamhanan sa Talisay  nga  nagdili  sa pagpakubkob  sa bas  ug  graba  sa sapa  sa Mananga nga sakop  sa hurisdiksyon  sa maong  dakbayan.

Matud  pa  sa mayor  nga  dili  lang  kay  ang bas  ug  graba  ra  sa Mananga  ang  iyang  gipabantayan  kang  Joavan  kundi  bisan  ang  mga  kahoy  sa kalasangan  sa bukirang  mga  lugar  sa Talisay.

Ang nakaanindot  ni Joavan  matud pa  sa mayor  kay ang  mga bas  ug  graba  ug kahoy  nga  masakmit  niini  ihandos  man  usab  kini  ngadto  sa DENR  aron  gamiton  sa maong  ahensya  nga  ebidensya  sa kasong  ipasaka  niini  batok  niadtong  malapason.

Bahin sa mga pasangil nga si Joavan  nangilkil   kuno sa mga tag-iya og  kahoy ug bas nga iyang gisikop, gipanghimakak  kini sa  mayor  ug gani  gisumbalik  niya   og  pasangil  nga  ang  mga tawong nasuko  kang  Joavan  mao  kadtong  mitunol  og  suborno  sa iyang  sinagop  apan  gisalindot  niini  ug  wala  dawata  tungod  kay  si Joavan dili kaantigo  mangilkil, matud pa  ni Fernandez.

Gawas niini, matud sa mayor nga aduna siya’y nadawat nga report nga aduna  kunoy  mga  mamaligyaay og mini  nga  delivery receipt sa dakbayan sa Toledo ug Lagtang, hinungdan nga susihon gayud sa mga sakop sa Vanguard ang mga delivery receipt sa mga sakyanang nagkarga og  bas ug graba.

Matud  pa  ni Fernandez  nga  kun masuta  nga genuine  ang  mga papeles  sa madakpan,  ika-release  dayon  ang  ilang  sakyanan  apan  kundili  i-hold  kini  ni Joavan, apan  pasanginlan  lagi  hinoon  kini  nga  nangilkil  og  kuwarta, sumala  pa  sa mayor. (BANAT NEWS)