Ginganla’g talawan mitigbas angol sa silingan

CEBU, Philippines - Natabas  ang  dagway  sa tawo   human  kini habasa  og  sundang  sa    iyang  silingan  nga ginganlan  niya  og  talawan  sa sitio Kawayan, barangay Lagtang, dakbayan sa Talisay niadtong  Biyernes  sa gabii.

Wala na magkadimao  ang  dagway ni Jerome Entoma, 29, sa maong  lugar   dihang  natabas  ang   iyang tuong nawong,  tuong mata ug agtang dihang  walay  kukaluoy  nga gihapsan og  sundang  ni Wilfredo Vergara, 29,  nga  iyang  silingan.

Sa imbestigasyon nila ni SPO4 Daniel Tarucan ug PO3 Ferdinand Pablo nasuta nga si Entoma ug Vergara nagkabangi  kaniadto  samtang  nagduwa sila  og basketball  sa ilang lugar.

Si Vergara   sa sayo pa nagtan-aw  og singing contest nga gipahigayon  sa ilang lugar ug kalit lang nga naabot si Entoma kinsa giingong hubog.

Unya giingong nagpasingit  dayon  kini si Entoma  pinaagi  sa  pagtuyo  og  bangga  kang Vergara ug gihapak  pa  sa iyang kamot  ang  ulo  niini.

Wala pa matagbaw gisinggitan pa ni Entoma si Vergara og talawan.

Sa paglikay sa kagubot si Vergara milakaw  ug misulod sa ilang balay apan giingong misunod si Entoma  ug misuway pa og sulod sa balay ni Vergara.

Si Vergara kinsa niadtong higayona naupsan   na  sa pailob  mikuha  sa iyang   sundang  ug kalit  nga gipatiran ang ilang pultahan aron maabli.

Si Entoma kinsa diha sa gawas maayong pagkahagba  human maigo sa pultahan    ug  didto  gihapsan dayon  ni Vergara  sa  iyang  sundang  ang  nawong  sa biktima.

Ang  mga  silingan  nila nakaingon  nga  suwerte  si Entoma  kay  habolan  ang sundang  ni Vergara  kay  kun  hait  pa  malagmit  mapunggotan  kini  og  liog.

Si Entoma  dali  nga gihatod  sa  mga  silingan  ngadto sa Talisay City District Hospital, samtang  si Vergara nasikop  usab  dayon  sa kapolisan. (BANAT NEWS)