Negosyante gipatay

CEBU, Philippines -  Patay ang usa ka negosyante nanag-iya og water refilling station human kini pusila sa duha ka wala mailhing kriminal samtang nag-abli sa iyang tindahan niadtong Sabado sa buntag diha sa barangay Balud, lungsod sa San Fernando.

Ang biktima giila sa kapolisan nga si Jacinto Sarucam, 80-anyos kinsa nakaangkon og usa ka samad pinusilan sa iyang li-og dali kining gidala ngadto sa Carcar City Hospital apan wala na kini makaabot pang buhi sa maong tambalanan.

Si Inspector Gerard Pelare, hepe sa San Fernando Police Station nagkanayon nga ang mga residente diha sa duol nakadungog og usa ka buto sa armas apan wala makakita sa mga kriminal kinsa daling misibat sakay sa usa ka motorsiklo.

Na-recover sa mga polis diha sa lugar nga nahitaboan ang usa ka kabhang sa bala sa .9mm nga pistola.

Matud ni Pelare nga gikatahong ang duha ka mga kriminal naghuwat kini kang Sarucam nga moabli sa iyang establisamento nga sagad niining buhaton alas-3 pa lang sa kaadlawon.

Si Pelare nagkanayon nga wala pa nila maestablisar kun personal nga bangi ang motibo sa maong insidente tungod kay base sa ilang imbestigasyon sa pamilya sa biktima si Sarucam walay nakaaway.

Ang nahinumduman lang sa pamilya sa biktima nga masuko kini sa mga nanaygon diha sa ilang balay. Apan matud ni Pelare nga mabaw kaayo kini nga rason kung basehan nga maoy hinungdan sa pagpamusil.

Ang kapolisan nagpahigayon og follow-up nga imbestigasyon sa maong insidente. (Brenda D. Batuto ug Ria Mae Y. Booc sa The Freeman/EIM) (BANAT NEWS)