Chicharon vendor wala abti og tuig 2013 gibirahan patay
CEBU, Philippines - Patay nang nalandig sa Talisay City District Hospital ang usa ka 20-anyos nga manindahay og chicharon human kini pusila sa duha ka wala mailhing mga lalaki nga nagsakay og usa ka motorsiklo kagahapon sa alas 3:30 sa kadlawon diha sa dalan Rabaya, barangay Tabunok, dakbayan sa Talisay.
Ang biktima giila sa kapolisan nga si Dominador Tabay Jr. taga sitio Mananga I, Tabunok, Talisay nga nakaangkon og samad pinusilan sa walang liog ug ang bala milahos sa tuong bahin ug laing samad pinusilan sa walang bahin sa lawas nga hinungdan sa iyang kamatayon.
Sa imbestigasyon nila ni SPO4 Daniel Tarucan ug PO3 Roelito Tano nagsakay sa iyang bisekleta nag-deliver og chicharon ang biktima dihang duha ka wala mailhing lalaki nga sakay sa usa ka motorsiklo ang kalit lang mitungha ug sa walay daghang pangutana gipusil ang biktima.
Si Inspector Rio Hugo Ipong sa pakighinabi niini sa Banat News mibutyag nga personal nga bangi ang usa sa ilang gisubay karon nga motibo sa pagpamusil. (/EIM) (BANAT NEWS)
- Latest
