World Bank midayeg sa Mandaue

CEBU, Philippines - Giila sa mga opisyales sa World Bank ang socialized housing nga proyekto sa dakbayan sa Mandaue isip “best practice”  ug maayong sumbanan sa ubang LGUs.

Matud ni Chris Pablo, representante sa World Bank Philippines nga nindot kaayo kining maong proyekto gumikan kay mahimo kining molahutay bisan pa man og wala na sa termino si Mayor Jonas Cortes.

“We have seen that the mayor is also empowering the communities and involving the private sectors which is really a good element for socialized housing program,” asoy ni Pablo.

Si Pablo, kauban ang upat ka mga tawo gikan sab sa World Bank mibisita sa Kobe, Canduman diin tukora ang socialized housing inabagan sa Ramon Aboitiz Foundation Incorporated.

Gibisita usab sa grupo ang 9.2 ektaryang luna sa Lower Tipolo ug Malibu, Subangdaku ug  ang 6.5 ka ektaryang relocation project sa Paknaan.

Gi-turnover na usab ni Cortes ngadto sa mga benepisyaryo ang 41 ka balay diha sa Paknaan socialized housing nga diin sagad sa bag-ong namuyo gikan sa gidemolis nga kabalayan sa Mahiga Creek. (BANAT NEWS)