Ex-convict gipusil naangol

CEBU, Philippines - Talandugon ang kahimtang sa usa ka giingong ex-convict human kini pusila sa usa ka wala mailhing tawo niadtong Miyerkules sa gabii diha sa sitio Mananga I, barangay Tabunok, dakbayan sa Talisay.

Ang biktimang si Doniel Obiso, 29,  residente sa maong dapit kinsa nakaangkon og samad pinusilan sa tuong  bahin sa likod, tuong dughan ug tuong bahin sa lawas ubos sa hawak daling gidala ngadto sa Talisay City District Hospital apan tungod sa iyang kahimtang gibalhin kini ngadto sa Vicente Sotto Memorial Medical Center.

Sa imbestigasyon nila ni SPO1 Mikie Espina ug PO1 Stephen Sefuesca nga si Obiso naglakaw kini diha sa karsada dihang kalit gipusil sa wala mailhing lalaki.

Si Espina nga nahinabi sa Banat News mibutyag nga si Obiso miangkon ngadto kanila nga nakonbikto na siya kaniadto sa kasong pagpangawat ug pagdala og mahait nga hinagiban ug napriso sa Talisay City Jail sa barangay Maghaway. Wala hinuon kini makompirmar sa Banat News gikan sa independenteng tinubdan.

Si Espina midugang nga personal nga bangi ang usa sa mga motibong ilang gilantaw kabahin sa maong hitabo ug intensiyon gyud sa kriminal nga patyon ang biktima.  (BANAT NEWS)