Info Department sa Capitol gisugyot

CEBU, Philippines - Gisugyot ni Association of Barangay Council President Jose Ribomaphil Holganza ang pagmugna og Corporate Communication and Public Information department  sa kagamhanang provincial sa lalawigan sa Sugbo.

Ang maong tinguha gihimug-atan base sa iyang giduso nga resolusyon   ngadto sa mga sakop sa hunta probinsiyal atol sa gipahigayon nga sesyon niini niadtong adlaw nga Lunes .

Sa maong  resolusyon  gipasabot  ni  Holganza nga angay  kaayo  nga  mahimong  institusyon  ang TV ug Sugbo News  isip  pagpalig-on  sa  information  department  sa Kapitolyo.

Sumala  sa maong  resolusyon  nga gikinahanglan  kaayo  sa katawhan  sa lalawigan  nga  masayud  sa  mga  kalihokan  sa tibuok  lalawigan  pinaagi  sa   departamento  sa kasayoran  niini.

Usa  sa mahimong  kamot  ug baba  sa maong  departamento  mao  ang TV ug Sugbo  News,  busa  mas maayo  nga  mahimo  kining  ipaila  nga  usa ka institusyon  sa  mga  balita   nga  dumalahon  sa kagamhanan  sa lalawigan.

Gusto  ni Holganza nga mapalig-on pa gayud ang nahisgutang programa nga nasugdan ubos sa pagdumala ni Governor Gwendolyn  Garcia  hinungdan nga iya kining gisugyot.

Hinuon aduna pay ubay- ubay nga mga pagtuon nga himoon  sa mga  sakop sa  provincial board alang sa sugyot sa nahisgutang ex -officio member sa hunta probinsiyal.

(BANAT NEWS)