Kawani sa Toledo City Hall ug laing duha nadakpan sa buy-bust operation
CEBU, Philippines - Nagkadaiyang pakete sa gituohang shabu ug tulo ka lalaki ang nasikop atol sa gipahigayong operasyon sa kapolisan sa Provincial Anti-Illegal Drugs Special Operation Task Group kagahapon sa buntag diha sa sitio Laguna sa barangay Bato syudad sa Toledo.
Ang mga nasikop mao silang Ben Alquiza Tubalado Jr., 40, nga nadestino sa engineering department sa kagamhanan sa syudad sa Toledo; Roel Canumay Alquiza, 37, nga napriso kaniadto tungod sa kasong murder apan na-dismissed kini duha na ka tuig ang milabay ug Alexis Jumao-as Caricari, 41, nga gipasanginlang maoy tinubdan sa gituohang shabu.
Matud pa ni SPO1 Reynaldo Solante, team leader, sa maong operasyon nga nakadawat sila’g taho kalabot sa pagpamaligya og ilegal nga drugas ni Tubalado sa maong dapit. Dihang nakompirmar ang kalihokan ni Tubalado gipahigayon dayon ang buy-bust operation batok niini hinungdan sa pagkasikop ni Tubalado, sumala pa nga kang Alquiza gitunol ni Tubalado ang marked money ug si Alquiza usab maoy mitunol sa usa ka paketeng shabu.
Sumala pa nga ang duha mitug-an nga kang Caricari sila nakapalit sa maong shabu hinungdan nga ila kining gisunod og dakop.
“Matud pa niya (Tabulado) nga dili kuno mamaligya og ginagmay kay tag-P8,000 gyud kuno ang palit ana niya (Caricari). Napugos pa gani mi’g sulod sa iyang balay kay mura’g nakabantay sa among presensiya pero wala na kadagan,” pasabot pa ni Solante. Nakuha gikan kang Caricari ang tulo ka paketeng gagmay’ng gituohang shabu ug laing 20 ka medium nga paketeng gituohang ang sulod shabu nga kantidad og P 21,500.
Gawas niini, nakuha usab ang laing 20 ka dagkong pakete sa gituohang shabu nga nagkantidad usab og P160 mil nga gidudahang halin sa ilegal nga drugas.
Gibanabanang mokabat sa P200 mil ang kantidad sa shabu nga nakuha sa maong operasyon. Sumala pa nga sakop sa negosyo sa ilegal nga drugas ni Caricari ang Toledo ug lungsod sa Pinamungajan. Si Caricari giisip nga level 2 drug pusher nga makapagawas og 20 ngadto 25 gramos nga shabu kada semana. (/EIM) (BANAT NEWS)
- Latest
