Allowance sa mga prosecutor wa hunonga

CEBU, Philippines - Gibutyag  ni Cebu City Mayor Michael Rama nga wala siya’y kamanduan sa pagpahunong sa paghatag sa syudad og allowance ngadto sa tanang mga prosecutors sa dakbayan sa Sugbo.

Nasayran nga mihangyo karon ang mga prosecutor sa siyudad nga mahibalik na ang ilang allowance. Mipasabot hinuon si Cebu City Administrator  Jose Marie Poblete nga temporaryong nahunong ang paghatag sa siyudad og allowance ngadto sa mga prosecutor human mahurot ang gahin nga gitagana kanila gumikan sa paghatag og umento  sa ilang gidawat nga allowance.

Nagkanayon si Poblete nga gikan sa tag P10mil matag buwan, gihimo kining tag P18 mil sugod  pa  niadtong   Enero karong tuiga.

Giklaro niya nga daan na silang gipasidan-an nga ang pundo   nga nagahin na sa siyudad sa annual budget niini, karong tuiga igo ra sa karaang rate sa ilang allowance.

Mao kini ang hinungdan nga kutob ra niadtong buwan sa Hunyo ang ilang nadawat nga allowance.

Gipasalig hinuon sa administrador sa siyudad nga nangita na sila karon og dugang pa mga tinubdan sa pundo sa siyudad aron magpadayon na ang paghatag og binuwan nga allowance ngadto sa mga prosecutor.

Matud pa ni Poblete nga wala usab kini magahini sa bag-ong giduso sa mayor nga supplemental budget No. 2 gumikan kay giuna ang mga importante  nga mga  gikinahanglan sa dakbayan  sama sa gasolina ug  ang pag-bayad sa konsumo sa kuryente ug tubig sa mga nagkadaiya nga buhatan sa City Hall. (BANAT NEWS)