Lalaki gikaligo og bala patay

CEBU, Philippines - Usa ka lalaking gituohang gi- salvage o ba kaha gi-ambush  ang napalgang patay nga naputos sa samad pinusilan ang lawas ug ulo sa barangay road sa Sitio Camarin, barangay Veto lungsod sa Minglanilla niadtong Lunes sa alas 9:20 sa gabii.

Ang biktima mao si Esli Villafuerte, 30, taga Calajoan lungsod sa Minglanilla apan wa gyud mahibaw-i kun si kinsa ang responsable.

Matud ni PO2 Vincent Alinabo, desk officer sa Minglanilla Police dihang nahinabi sa Banat News usa ka habal habal drayber ang naagi sa lugar ug maoy nakadiskubre sa biktima nga nagbuy-od sa karsada ug gi-report dayun nila sa kapulisan.

Sa pag-responde sa mga polis naabtan niini ang biktima nga naglunang sa kaugalingong dugo nga nabulit sa samad pinusilan ang lawas ug ang ulo niini nga maoy nakaingon sa hinanali nga kamatayon.

Gidala ang biktima sa punerarya sa lungsod ug kagahapon sa buntag pa kini giila sa igsoon niini nga si Eman Villafuerte, 32, nagpuyo sa maong lugar.

Ang kapulisan nibalik sa crime scene kagahapon aron pagpanghipos og dugang impormasyon aron matumbok ang mga responsable sa krimen ug matugkad usab ang motibo niini.

Gisusi pa usab karun sa kapulisan ang background sa biktima aron mahibaw-an kun duna ba kini gikabangi ug uban pang posibilidad.

Apan base sa report sa Balitang Bisdak kagahapon, ang inahan sa biktima nagdudang may kalambigitan sa illegal nga drugas ang kamatayon niini. (BANAT NEWS)