"Nayawaang" mga tinun-an gipaubos sa stress debriefing

CEBU, Philippines - Gipaubos na kagahapon sa buntag sa stress debriefing ang 17 ka mga tinun-an sa Jaclupan National High School, dakbayan sa Talisay ug ang 12 ka mga ginikanan.

Ang maong mga tinun-an giingong mga nasudlan og dautang espiritu niadtong Lunes ug Martes apan dunay pipila kanila ang dili pa andam nga mopaubos sa stress debriefing diha sa Talisay City Hall.

Si Benjamin Baruc, stress debriefing consultant mibutyag nga 11 ka mga stress debriefing experts gikan sa rehiyonal nga buhatan sa Department of Social Welfare and Development (DSWD) ang mihimo niini sa mga bata ug mga ginikanan.

Matud ni Baruc nga ang stress debriefing nagsentro kini sa psycho-social ug dili sila mohisgot kabahin sa spiritual nga ang tumong aron masuta kung kinsa sa mga bata ang nagkinahanglan og medical treatment ug psycho therapy.

Human sa sesyon tun-an ang resulta niini kung nagkinahanglan ba og medical treatment o uban pang pagtabang.

Sa laing bahin, kagahapon sa buntag ang mga magtutudlo ug mga tinun-an nga mitungha kagahapon sa tunghaan ang nagpahigayon og novena pahinungod sa ilang patrona nga Birhen sa Fatima.

Ang prinsipal sa tunghaan nga si Maria Imelda Valde nalipay nga nagkaanam na og kadaghan ang mga bata nga mibalik na og sulod sa ilang klase.

Matud niya nga niadtong Miyerkules kapin lang sa 20 ka mga estudyante ang mitungha apan kagahapon mikabat na kini sa 79 maong giawhag ang mga tinun-an nga kinahanglang mobalik na sila og eskuyla tungod kay duol na ang ilang periodical test.

Sa laing bahin usab si Konsehal Celiapo Cabuenas, committee chairman sa social services nagkanayon nga nasuta nga kasagaran sa mga tinun-an lisud ang kahimtang sa pamuyo nga ang mga ginikanan niini walay klarong panginabuhian. (BANAT NEWS)