Napulo ka wa mahumang armas nasakmit

CEBU, Philippines - Napulo ka mga paltik nga kalibre .45 nga armas nga wala pa hingpit mahuman ang nasakmit sa kapulisan atol sa gilusad nga pagpangronda sa usa ka payag nga usa diay ka ilegal nga buhatanan sa mga paltik nga armas sa Lapulapu St., barangay Suba sa siyudad sa Danao.

Matod ni SPO4 Edgar Gomez sa Danao City Police dihang nahinabi sa Banat News miingon nga nataymingan ra ang pagkasikop sa grupo tungod kay ang tuyo unta sa iyang mga kauban sa maong dapit mao ang pagpaniid aron dakpon ang sugal nga masiao.

Sila si SPO4 Nilo Pantoja ug mga kaubanan nakugang dihang sa ilang pag-abot dunay mga kalalakin-an ang nanagan paggawas sa usa ka payag ug dihang ilang gitan-aw ang payag nakit-an nila ang maong mga armas diha sa lamisa.

“Wala pa mahuman pero porma na gyud og armas,” dugang pamahayag ni Gomez. Ang maong mga nasakmit nga armas kasamtangang gikustodiya sa kapulisan ug padayon pang gisusi kun si kinsa ang nanag-iya sa maong payag.

Samtang ang hepe sa kapolisan sa syudad sa Danao, Supt. Ricky Delilis mibutyag usab nga sukad nga gitangtang na sa PNP ang pag-legalized sa mga pabrika sa armas sa dakbayan sa Danao misiaw ang mga ‘smalltime’ nga manghimoay niini.

Gawas niini, giklaro usab ni Delilis nga walay kalambigitan sa eleksyon ang mga armas nga ilang nakuha gikan sa payag tungod kay bisan pa man wala pa magsingabot ang eleksyon daghan na gyud ang mga ‘smalltime’ nga manghimoay og armas sa maong siyudad. (EIM) (BANAT NEWS)