Cortes ug mga kauban mihandos sa ilang COC

CEBU, Philippines - Kaliboan ka mga dumadapig kang Mayor Jonas Cortes   sa dakbayan sa Mandaue mikuyog kaniya   ug kang Bise Mayor Glenn Bercede uban sa ilang kompletong line- up sa mga kandidato pagka-konsehal sa umaabot nga election sa dinungan nila nga paghandos sa ilang Certificate of Candidacy (CoC) sa Commission on Election (Comelec) nga nahimutang sa Sports and Cultural Complex sa sitio Tribunal sa barangay Centro sa maong dakbayan kagahapon sa alas 10:00 ang takna  sa buntag.

Si Mayor Cortes nga magpasubli sa iyang ikatulong termino maoy nanguna sa iyang grupo nga nanglakaw subay   sa dalan S.B. Cabahug extention sa sitio Tribunal sa barangay Centro paingon ngadto sa buhatan sa pagduso sa ilang CoC.

Naglakip sa mga sakop sa LP nga mga konsehal sa line up ni Mayor Cortes nga pulos magpasubli sa ilang katungdanan mao ang mga konsehal nga sila si Lollipop Ouano-Dizon, Jimmy Lumapas, Jefferson Ceniza, Demetrio Cortes Jr., Bethoveen Andaya, Editha Cabahug, Elestone Dabon, Diosdado Suico ug Benjamin Basiga.

Si Mayor Cortes nga nahinabi sa press conference nga gipahigayon human sila mosang-at sa ilang CoC mipadayag nga iyang ipadayon ang mga kalamboan sa dakbayan sa Mandaue niining iyang katapusan nga termino.

Dugang pa niya nga lakip sa padayon niyang hatagan og dakong pagtagad   mao ang pagpalambo sa kahimtang sa edukasyon sa dakbayan pinaagi sa pagtukod og dugang mga lawak saringan.

Si manlalaban Fleur Ann Gujilde nga maoy Comelec Registrar sa maong dakbayan mibutyag   sa Banat News nga sukad sa ilang pagbukas niadtong Oktubre 1 ang bugtong nakasumiter sa iyang CoC mao ra si Konsehal Nenita Layese nga magpasubli sa iyang ikaduhang termino.

Si Konsehal Layese nga sakop sa LP ni Mayor Cortes sayo nga mihandos sa iyang CoC sa Comelec kay milarga man kini ngadto sa gawas sa nasud. (/WC) (BANAT NEWS)