6 mil mitambong sa people's assembly ni Rama

CEBU, Philippines - Napuno sa emosyon ug hudyaka ang people’s assembly sa Team Rama nga gipangulohan ni Mayor Michael Rama kagahapon didto sa Aznar Coliseum niining dakbayan sa Sugbo.

Mikabat sa dul-an sa 6,000 ka tawo ang mihugop sa nahisgutang kalihokan diin gipaila-ila sa mayor ang kinatibuk-an niya nga line-up.

Napuno sa mga tarpaulin ug sa mga tawo nga nagsul-ob og green ug yellow   nga T-shirt ang coliseum.

Samtang daghan ang nahimuot sa gipadayag sa pambato sa Team Rama sa pagka-kongresista sa norte   nga distrito sa dakbayan sa Sugbo nga si Annabelle Rama kinsa mihulagway nga wala siya mahadlok   sa pamilyang del Mar, ang iyang ikaatbang sa umaabot nga piniliay.

Nasayran nga hangtud karon wala pa makahukom sila si Kongresista Cutie del Mar ug kanhi kongresista Raul del Mar kung kinsa nilang duha ang mokandidato atbang ni Annabelle.

Giingong gibutyag ni Cutie nga andam niya nga hatagan   og higayon nga padaganon pagbalik ang iyang amahan.

Apan si Annabelle sa iyang bahin miingon nga “wala ko mahadlok bisan kinsa nilang duha, mosukol ko,” suma pa niya.

Gikatakda nga mosumiter sa ilang tagsa-tasga ka certificate of candidacy (COC) ang mga kandidato sa Team Rama ugma, Biyernes ang kataposang adlaw sa hinandusay sa COC alang sa tanang kandidato sa umaabot nga election.

Ugma usab mo-file sa ilang COC ang kaatbang sa Team Rama nga mao ang Bando Osmeña Pundok Kauswagan (BOPK) nga gipangulohan ni Kongresista Tomas Osmeña. (BANAT NEWS)