Namusil gidakdaka'g bato

CEBU, Philippines - Upat ang naangol usa niini tanod sa pagpamusil nga nahitabo sa gipahigayong disco atol sa kapistahan sa sitio Himatulan sa barangay General Climaco siyudad sa Toledo kagahapon sa 1:00 sa sayong kaadlawon apan dangtan og pipila ka oras napalgan usab nga patay na ang gitumbok nga suspek.

Ang mga biktima mao sila si Jonathan Bolo Abadinas, 31, nagpuyo sa maong lugar nga naigo sa bukobuko ug walang bahin sa abaga ang ikaduhang biktima mao ang iyang maguwang nga si Diosdado Bolo Abadinas,49, tanod sa maong lugar nga naigo sa walang bahin sa abaga.

Ang ikatulong biktima mao si Revee Dacumos Abadinas, 29, naigo usab sa walang bahin sa pulso ug Jonire Habasa Abadinas, 22, naigo sa ulo.

Ang gitumbok nga namusil kanila mao si Jonic Secretaria, nagpuyo sa sitio Aghop, barangay Gaas sa lungsod sa Balamban kinsa napalgan usab pagkahapon nga gidakdakan og mga bato ang ulo diha daplin sa sapa ug patay na.

Matud ni PO3 Roxam Enario sa Balamban Police Station dihang nahinabi sa Banat News ang tanod nga napusilan apil sa nagpatunghay sa kalinaw sa maong kalingawan.

Sumala pa kalit lang miabot ang suspek ug miduol sa mga biktima ug gitagsatagsa og pamusil. Giingong may kauban ang suspek nga miapil og pamusil. Ang mga biktima daling gihatud sa Toledo City District Hospital. Kagahapon sa udto nakadawat ang kapolisan og report nga napalgang patay si Secretaria daplin sa sapa sa maong lugar.

Ang chief investigator nga si SPO3 Henry Acosta ug mga kaubanan kinsa didto sa lugar mibutyag nga patay na si Secretaria ug nagusbat ang ulo niini gikan sa pagdakdak og bato.

Si Acosta mibutyag nga dako ang ilang pagdudang mga paryente sa mga napusilan ang mipatay sa suspek nga buot makabawos. (BANAT NEWS)