PNoy mi-award sa TOBOY ug LUPON

CEBU, Philippines - Gipangunahan ni Presidente Benigno “Noynoy” S. Aquino III ang awarding ceremonies alang sa The Outstanding Barangay Officials (TOBOY) ug Lupong Tagapamayapa (LUPON) sa lalawigan sa Bohol nga gipahigayon sa Bohol Wisdom School gymnasium ning bag-ohay lang.

Ang Banat News   misaksi usab sa maong kalihokan nga giatol usab sa 1st Bohol Barangay Day Celebration, ang adlaw nga gigahin agi og pagdayeg ug pag-ila sa mga mahinungdanong kontribusyon sa mga trabahanteng lokal sa ilang natampo sa pagpalambo sa nasud sa ilang tagsa-tagsa ka barangay.

Gidayeg sa presidente ang mga mananaog ug miingon nga sila ang mga maayong sulondon isip mga maayong mamumuo nga nagsilbi sa katawhang Pilipino ug nanghinaot ang Pamuno nasud nga unta himoon usab kini sa ubang mga local government unit dili lamang sa Bohol kundi bisan sa Cebu ug sa tibuok rehiyon 7 ug sa tibuok nasud.

Gipadayag usab ni Presidente Aquino ang iyang pasalamat sa mga napili nga mga opisyal sa barangay ug Lupong Tagapamayapa nga matud pa niya dili igo ang pasidungog o unsa mang pahalipay nga gihatag kanila aron tupngan ang gibubo nilang kakugi ug dedikasyon sa ilang trabaho.

Matud pa usab sa presidente nga pinaagi sa mga maayong binuhatan sa maong mga opisyal nga midaog, iyang gipanghinaot nga unta mao usab kini ang sundon sa ubang mga may planong moserbisyo sa tagsa-tagsa nila ka barangay aron masilbihan pag-ayo ang ilang tagsa-tagsa ka komunidad nga maoy yawe sa kalamboan ug kalampusan sa nasud.

Gipanghinaot usab sa pangulo sa nasud nga unta ang maong pagserbisyo kinasing-kasing gayud diin wala magpaabot og balos ug nga ila untang ipatik sa ilang tagsa-tagsa ka huna-huna nga alang gayud sa kaayohan sa nasud ang tanan.

Gawas niini gipasabot sa presidente nga kinahanglang lantawon   sa mga lokal nga opisyal sa komunidad ang kaayohan sa ilang mga konstituwente sa ilang tagsa-tagsa ka lugar. (-Correspondent/WC) (BANAT NEWS)