Giluba samtang nangihi kritikal

CEBU, Philippines - Kritikal ang kahimtang sa usa ka driver sa traysikad human kini dunggaba samtang nangihi sa comfort room (CR) sa merkado publiko sa Poblacion lungsod sa Sibonga kagahapon sa alas 3:00 sa kaadlawon.

Ang biktima mao si Roque Encarnacion, 46, ulitawo, drayber sa traysikad ug nagpuyo ra sa maong lugar.

Samtang ang suspek giila usab nga si Reynaldo Canete, 40, ulitawo,  nga taga Sitio Tangke, barangay Poblacion sa maong lungsod.

Si PO2 Arnold Frenal sa Sibonga Police Station mibutyag sa Banat News   nga ang biktima mipahuway   makadiyot   ug miparking sa iyang sikad- sikad ug gumikan malagmit kay kaihion,   nagdali nga misulod sa CR aron pagtuman sa sugo sa lawas.

Apan samtang kini nangihi, kalit lang kining gisulod sa suspek dayung gihansakan sa iyang kutsilyo ang lawas   sa biktima. Ang biktima nakaangkon og duha ka samad   dinunggaban sa iyang dughan ug tuong bukton ug dihang misirit ang daghang dugo misirit usab og dagan pahilayo sa maong lugar ang suspek.

Ang biktima gitabang sa mga tawo   sa maong dapit   ug gihatud dayun   ngadto sa Carcar District Hospital sa siyudad sa Carcar apan gi-transfer usab dayon sa tambalanan sa dakbayan sa Sugbo.

Hinuon ang suspek boluntaryong mitahan sa kapolisan ug   gibalhug   usab dayon sa karsel samtang gihikay ang kasong ipasaka.

Wala pa hisayri kun dumot ba ang hinungdan sa maong pagpanunggab sanglit dili pa motubag ang suspek sa mga pangutana sa kapolisan kaniya.  (BANAT NEWS)