Ulo gidakdaka'g bato

CEBU, Philippines - Duha ka mga drayber sa habalhabal ang napalgang patay sa managlahing dapit sa lalawigan sa Sugbo niadtong Miyerkules, usa kanila ang brutal nga gibulit og samad dinunggaban, gigulgol ug pagkahuman gipusdakan pa og bato ang ulo.

Maayong pagkapiyapi sa ulo sa biktimang si Ritchie Gerondio, 22, taga barangay Nangka sa lungsod sa Consolacion kinsa panginabuhi ang pagmaneho og habalhabal, duna kini walo pa ka buwang anak. Napalgan ang patay’ng lawas niini sa kalibonan sa barangay Tilha-ong lungsod sa Consolacion niadtong Miyerkules sa 1:20 sa hapon. Wala pay natumbok nga kriminal ang mga imbestigador sa maong krimen.

Matud ni PO2 Jonaskie Romero sa Consolacion Police Station dihang nahinabi sa Banat News gituohang gitulis ang biktima ug gikarnap ang motorsiklo niini sa iyaha rang pasahero nga ang tuyo dautan diay ngadto sa biktima.

Base sa mga samad sa biktima nagtuo ang kapolisan nga misukol kini sa mamumuno maong daghan kining mga samad dinunggaban sa kalawasan ilabi na sa dughan ug sa ubol-ubol nga gidudahang gigulgol.

Tungod ba kaha sa pagsukol sa biktima gipusdakan pa gyud og dakong bato sa mga kriminal ang nawong ni Gerondio ug gidala ang motorsiklo niini nga Honda XRM.

Ang kapolisan nagtuong carnapping ang motibo sa krimen apan wala sab nila isalikway ang posibilidad nga dunay dakong kasuko ang mamumuno ngadto sa biktima tungod sa gigrabihon sa pamaagi sa pagpatay.

Sa laing insidente, maayong pagkalungag sa buko-buko sa usa ka habal-habal drayber nga si Joseph Lavilla, 23, taga barangay Papan sa lungsod sa Sibonga human kini pusila sa sa wala mailhing mamumuno samtang paingon na unta mupauli kagahapon sa buntag pag-abot sa Barangay Bae, Sibonga.

Matud pa nga nagmaneho si Lavilla sa Honda Wave nga motorsiklo niini dihang gipusil sa buko-buko dihang nahiabot na sa awaaw nga lugar.

Matud ni PO2 Ederlino Bacusmo, homicide investigator, nga naglisod sila sa pag-ila sa mamumuno kay wala’y nakakita sa maong insidente.

“Possible napareglahan lang ni kay wala man ni kontra sa discohan pero kiat la’g mahubog,” matud ni Bacusmo.

Padayon pa ang imbestigasyon sa kapolisan sa Consolacion ug sa Sibonga sa maong buwag nga krimen.  (BANAT NEWS)