Amahan ug anak giakgotan sa sanggot angol

CEBU, Philippines - Gumikan lang sa panaglalis bahin sa lubi natigbasan sa sanggot ang amahan ug anak human kini panigbasa sa ilang silingan sa barangay Esperanza isla sa Pilar Camotes sa miaging Biyernes.

Ang mga biktima mao sila si Luis Nudalo Sr. ug ang iyang anak nga si Luis Nudalo Jr., samtang ang suspetsado nailhan usab nga si Ronnie Cataros.

Sa pasiunang imbestigasyon sa kapolisan nasayran nga ang mga biktima nangani sa ilang lubi sa maong barangay aron koprason.

Apan samtang nangatkat sila sa lubi mitungha ang suspetsado ug gikatahong gikasab-an niini ang mga biktima ug gipasanginlan nga nangawat sa iyang lubi.

Apan nakiglalis ang mga biktima tungod kay ila man kunong kaugalingong kalubihan ang ilang gisaka ug gipanguhaan og mga lahing.

Busa nagkasabot sila nga moadto sa buhatan sa kapitan sa barangay aron sila mahusay.

Apan samtang paatubang sila sa barangay hall gikatahong ang suspetsado kalit nga milanit sa sanggot nga gitakin sa hawak nga si Nudalo Sr. kay akgotan unta niini ang liog sa biktima.

Apan nakalihay-lihay si Nudalo Sr. busa nagkalainlaing dapit ra sa iyang lawas ang nangasamad. Mitabang usab og ilog si Nudalo Jr. hinungdan nga nangasamad usab ang nagkalainlaing bahin sa lawas niini apan milampos gyud siya sa pag-ilog sa maong sanggot.

Dihang nailog na nila ang sanggot, wala nila akgoti sa liog ang suspetsado apan ilang gitabangan og kulata hinungdan nga nalandig kini sa tambalanan.

Sa pakighinabi sa Banat News ni PO3 Al Garciano sa Pilar Police Station, kini mibutyag nga naggumikan lang sa away sa lubi ang hinungdan sa maong insidente.

Matud pa ni Garciano nga mihutlay ang lawas sa biktima gumikan sa kinumo sa amahan ug anak nga gilubok sa lawas niini ug gihatod kini ngadto sa Ormoc District Hospital, samtang ang duha ka biktima didto ra kini patambali sa Pilar Municipal Health Center sa ilang mga samad sa lawas.