Talisay mosuporta sa Press Freedom Week

CEBU, Philippines - Ang konseho sa dakbayan sa Talisay misuporta sa pagsaulog sa Cebu Broadcaster’s Month niining buwana ug sa 18th Press Freedom Week nga buksan karong Septiyembre 16, 2012.

Sa ilang regular session sa miaging Martes si Konsehal Danny Caballero sa oposisyon mipalabang og resolusyon bahin sa ilang suporta sa mga kalihukan sa mga sakop sa media sa pagsaulog sa Broadcaster’s Month ug Press Freedom Week.

Sa iyang resolusyon gibatbat niya nga sa panahon nga ang nasud gihakop sa kangitngit   sa mga isyung politikanhon, ang taga radio ug pamantalaan misalikway sa kinaiyang pagpalabwanay ug gipunting sa ilang trabaho sa tukmang paghatud sa mga balita ug kasayoran sa katawhan busa takus lamang suportahan ang pagsaulog nila sa press freedom kun kagawasan sa pamalita.

Matud ni Caballero nga ang media adunay doble nga papel o kaakohan sa komunidad ug sa nasud.

Ang media usab adunay katungdanan sa pakig-abin sa gobiyerno kay sila man ang tigsabwag og mga impormasyon ngadto sa publiko sa mga nahimo sa kagamhanan.

Gawas niini ang media matawag nga usa ka watch dog tungod kay sila man ang mohungit og kasayoran ngadto sa publiko kung adunay mga kalapasan o pagpangabuso nga himoon ang mga tawong anaa sa gahom.

Busa alang kang Caballero nga walay katarungan nga di suportahan ang press freedom celebration sa taga media. (BANAT NEWS)