Ang Kasaysayan Karon Septiyembre 3

La Independencia

1898—Migawas ang unang kopya sa pamantalaang La Independencia, nga giisip nga maoy tigpamaba sa rebolusyon nga giestablisar ni Hen. Antonio Luna. Ang maong pamantalaan nagpadayon sa pagmantala hangtud Nobiyembre 11,1900 kansang mga staff gilangkoban ni Luna isip direktor, Salvador Vivencio del Rosario (editor), Jose C. Abreu, Cecilio Apostol, Fernando Ma. Guerrero, Mariano V. del Rosario, ug Clemente J. Zulueta isip mga staff writers (reporter) ug Felipe G. Calderon isip proofreader. Samtang kontribyutor usab sila si T. H. Pardo de Tavera, Jose Palma, Rosa R. Sevilla, Florentina Arellano, Apolinario Mabini ug uban pang edukado ug impluwensyadong mga Filipino.

Bagyong Nitang

1984—Gikusokuso sa bagyong Nitang nga may international name nga Typhoon Ike ang Pilipinas. Ang bagyong Nitang may gikusgong 185 mph dihang miigo sa Surigao del Norte. Mikalas kini og kapin 3,000 ka tawo ug kapin 500,000 ang nawad-an og panimalay ug giguba niini ang tanang kalubihan sa nasud. Sa wala matinong hinungdan, nagmagahi si kaniadto presidente Ferdinand Marcos pagdawat sa bisan unsang matang sa hinabang gikan sa ubang nasud.

Buslot sa Ozone Layer

2000—Niadtong Septiyembre 3, 2000 gipagawas sa NASA ang data kabahin sa gidak-on sa buslot sa Ozone Layer sa kalangitan. Kini miabot na og 11 million square miles. Ang Ozone Layer maoy nanalipod sa tanang kinabuhi sa kalibutan batok sa makamatay nga init sa adlaw susama sa usa ka payong aron dili direktang makasulod ang init sa adlaw. Base sa pagtuon ang grabeng polusyon sama sa pagsunog og plastic, pagbuga og makadaot nga aso, paggamit og kemikal sa mga air condition nga gidili na karon ug ang pag-us-os sa temperature sa stratosphere ang usa sa nakapapaspas sa pagdako sa maong buslot. Ang maong buslot natunong sa nasud sa Chile maong init kaayo ang temperatura sa maong nasud bisan dili ting-init.