Duha ka provincial hospital subhan karong sunod buwan

CEBU, Philippines - Gitakda nga duha ka hospital ang subhan ni Gobernador Gwendolyn Garcia karong Septiyembre ug Oktubre ning tuiga. Ang maong mga tambalanan nga iya sa lalawigan mao ang gipanarok sa lungsod sa Balamban ug sa dakbayan sa Danao.

Sayo ning tuiga gisubhan usab ang Carcar Provincial Hospital ang daan na nga tambalanan ug district hospital nga gihimong provincial hospital.

Kaniadto ang maong tambalanan usa lamang ka- 25 bedding capacity, apan dihang gibuboan sa gobernador sa gahin nga gikan sa lalawigan og minilyon ka pesos nahimo kining 100 bedding capacity karon. Atol sa tigum nga gipatawag sa gobernador uban sa mga contractor, Provincial Engineering Office, ug mga engineer nga gipangulohan ni Engr. Adolfo Quiroga ug uban pang mga Department Head sa Kapitolyo ilang nasabotan ang bahin sa pagsubo sa Cebu Provincial Hospital sa Balamban karong umaabot nga Septiyembre 28, 2012, samtang sa Oktubre 10, 2012, isunod usab ang pagsubo sa Cebu Provincial Hospital sa Danao City. Gitakda usab nga subhan sa gobernador ang road concreting project sa lungsod sa Pilar, isla sa Camotes karong umaabot nga Nobiyembre 29, ning tuiga.

Hinuon sa dili pa ang mga petsa sa maong mga inugurasyon sa duha ka mga tambalanan susihon una sa gobernador ang kahimtang sa maong mga proyekto. (BANAT NEWS)