Blogger nga misaway ni Sotto pabor sa RH Bill?

CEBU, Philippines - Sa usa ka talagsaong hitabo, ang US blogger nga mipasangil kang Senador Tito Sotto nga nangopya sa iyang blog nga wala mananghid kaniya ug gibatbat ngadto sa hawanan sa Senado bahin sa kontraseptibo miawhag hinuon sa mga Filipino nga kababayen-an nga ipatigbabaw ang ilang katungod.

Si Sotto kinsa usa sa mga nangusog sa pagbabag sa kontrobersyal nga Reproductive Health Bill (RH Bill) gipasanginlan sa blogger nga si Sarah Pope nga mikopya sa iyang blog nga maoy gibatbat sa senador diha sa Senado niadtong Huwebes.

 Ang blog ni Pope naghisgot sa makadaot nga epekto sa paggamit og kontraseptibo apan sa bag-o niining blog human sa iyang pagsaway kang Sotto kini midasig sa kababayen-ang Filipino nga sila maoy pabut-on kun mogamit sila og kontraseptibo.

“Women of the Philippines, I am sorry my blog was used and twisted against you. You deserve the choice to use The Pill if you want or need to based on your particular circumstances. While I want you to know that this choice has health consequences, I, in no way would ever condone taking this choice away from you!" matud pang Pope nga gikutlo sa GMA News. Online.

Gihimakak hinuon sa chief of staff ni Sotto nga si Atty. Hector Villacorta nga gikopya nila ang blog ni Pope nga maoy gipanulti ni Sotto sa iyang speech sa Senado, matud pa niini nga tinud-anay nga parehas ang unod sa speech ug sa blog apan gikopya nila kini sa usa ka libro nga sinuwat ni Dr. Campbell-McBride.

Wala gihapon modawat si Pope sa eksplinasyon sanglit giinsister niyang siya maoy mikopya sa libro ni McBride gamit ang iyang kaugalingong mga pulong sa iyang blog, ug kini maoy gikopya sa speech ug dili ang kang McBride.

Gikasagmuyo usab ni Pope ang gihulagway niyang pagtuis sa unod sa iyang blog ug paghatag og pokus kabahin sa epekto sa kontraseptibo aron gamiton pag-edukar sa kababayen-an sa Pilipinas.   EIM  - BANAT NEWS