CCEF kaabag sa pag-atiman sa dagat

CEBU, Philippines - Aron maprotektahan ang mga mahinungdanong kabtangan sa kadagatan, ang Coastal Conservation and Education Foundation Inc. (CCEF) naningkamot sa pagproteher sa kadagatan ug sa mga butang sa ilawom niini karong nasinatian na sa nasud ang climate change.

Sa tuyo nga may makaon pa ang katawhan gikan sa dagat, ang CCEF   milusad og programa sa pag-amping sa mga bato ilawom sa dagat.

Ang maong mga bato maoy pasilonganan ug itloganan sa mga isda busa gipanalipdan kini pag-ayo sa CCEF.

Sumala ni Rebecca Smith, Vice President and Treasurer sa CCEF atol sa CCEF website launching and mural painting kagahapon didto sa Handuraw Pizza sa Gorordo Avenue sa syudad sa Sugbo, nga ang ilang tahas mao ang pag-edukar sa katawhan bahin sa hustong pag-amping sa kadagatan.

Sila ang kaabag sa kagamhanan sa pagbadlong sa mga dinamitiro ug kadtong panagat nga mogusbat sa kabatoan ilawom sa dagat . Samtang si manlalaban Rose Liza Eisma Osorio nga mitambong sa kalihokan kagahapon nagkanayon nga pinaagi sa tema nga Think Globally Act Globally, ilang gi-edukar ang katawhan nga motabang kini sa pag-atiman sa kadagatan ug sa mga butang sa ilawom niini  sama sa isda ug kabatoan.    - BANAT NEWS